Nongpoh, Naiwieng 03: Ka Ri Bhoi Dorbar ha ka jingïakynduh lang ki nongïalam hynin ka sngi ha Circuit House, Nongpoh ki la ai khublei kyrpang ïa ka sorkar MDA bad khamtam ïa u Myntri Rangbah ka jylla, u Conrad K. Sangma bad kumjuh ruh ïa u MLA ka Jirang ba la urlong ka jingkyntiew kyrdan noh ïa ka Western Administrative Unit sha ka kyrdan Civil Sub Division.
Na ka liang ki nongïalam ka Ri Bhoi Dorbar ki la ïa kynduh lang mynta ka sngi ha Nongpoh ban ïa kren ruh halor shibun ki mat ba dang sahteng ha kaba la don ryngkat naduh u MLA ka Nongpoh, u Bah Mayral Born Syiem, u Presdient ka Ri Bhoi Dorbar, u Bah R.B Shadap, u Senior Vice President, u Bah R.R Makdoh bad kiwei kiwei ki niongïalam ka Ri Bhoi Dorbar.
Haba kren sha ki nongthoh Khubor, u President ka Ri Bhoi Dorbar, u Bah R.B Shadap, u la ong ba ka jingdawa ban kyntiew kyrdan ïa ka Western Administrative Unit sha ka kyrdan Civil Sub Division ka dei kawei na ka mat jingdawa ba la buh da ka Ri Bhoi Dorbar la bun phew snem mynta bad ka Ri Bhoi Dorbar ka la sngewkmen ba ha kane ka kynti kane ka jingdawa ka la urlong da ka jingkloi u Myntri rangbah ban sngap ïa ka jingud jingnam ki paidbah ka Ri Bhoi bad ka burom ka leit sha u myntri rangbah, ka sorkar MDA, u MLA ka Jirang, u Bah Sosthenes Sohtun, u Dr. D.D Lapangbad kynthup baroh kiba la don bynta ban dawa ïa kane ka Civil Sub Division.
U la pynpaw ruh ba ka Ri Bhoi Dorbar kan long kaba la kloi ruh ba ïa don bynta ha ka 24 tarik u Naiwieng ba u Myntri rangbah un wan ban plie ïa kane ka jingkyntiew kyrdan sha ka Civil Sub Division na ka Administrative Unit, namar ka nongrim ka Ri Bhoi Dorbar ka pdiang ïa baroh ki kam pynroi khlem da peit shiliang khmat lada wan kano kano ka sorkar haba ka trei bad ai jingmyntoi ïa ki paidbah ka Ri Bhoi.
Shuh shuh, nalor ka jingai khublei kyrpang ïa ka sorkar MDA halor kane ka Civil sub division na kabynta ki paidbah ka Western Ri Bhoi, ka Ri Bhoi Dorbar ka dang kyrpad jur ruh ïa u Myntri rangbah ban pynurlong ïa kiwei pat ki jingdawa ba hakhmat ka Ri Bhoi Dorbar ba kynthup ïa ka Civil Sub Division na ka bynta ka Umsning bad Eastern Ri Bhoi bad kumjuh ruh ban wan rah noh ïa ka ophis ka C&RD Block na ka bynta ka Umden Nongtluh bad ka Mawhati, u la bynrap.
