Shillong, Lber 4: U bah Wanshwa Nongtdu District President jong ka Jaintia Hills District u la ai khublei ïa u myntri ba dei peit ïa ki kam pynroi nongkyndong u Abu Taher Mandal bad ïa ka sorkar kaba la sngap ïa ka jingkyntu ka party HSPDP ban pyntrei kam ïa ka Community bad Rural Development Block Lumshnong.
Katkum ka jingpynbna sorkar kaba la pynmih ha ka 16th Rymphang 2024, la thung ïa u bah Lamriche Kharmon MCS ban shimti ïa ka kam Block Development Officer jong ka Block Lumshnong bad kane kan long ka jingmyntoi ïa ki paidbah kane ka thaiñ.
ïa kane ka Lumshnong C&RD Block la plie da u myntri rangbah ka jylla u Conrad K Sangma ha 5th Nohprah 2022, hynrei haduh ka 2 Rymphang 2024 ka sngi ba u President ka HSPDP Jaintia Hills u la leit ban ïa kynduh ïa u myntri kam pynroi nongkyndong kam pat treikam.
Na kaliang jong ka party HSPDP Jiantia Hills ka ai khublei ïa u myntri namar ba u la ai ka jingkular ha ka jingïakynduh bad u la pynurlong ïa ka jingkular jong u ha ka 16th Rymphang 2024 ba la pynmih ïa ka jingpynbna sorkar ba la thung ïa u BDO jong ka Block Lumshnong.
Na ka bynta ka jingmyntoi jong ki paidbah katei ka thaiñ ki shnong kiba hap hapoh kane ka Blok ki don haduh 56 tylli, ka MLA jong kane ka jaka ruh ka la kren ha ka dorbar mang tyngka halor kane Block ha kaba kum ka party ka ai khublei ïa ka MLA ka kong Santa Mary Shylla kaba la kren ïakane ka kam hapoh ka ïing dorbar thawaiñ ka jylla ha dien bala dep mih kane ka jingpynbna sorkar.
