Ai jingsumar ei bad pynshai ka Mawngap Lumparing VO halor ka jingma na u drok ha ka shnong Mawngap

Mawngap, ‘Naiwieng, 13: Ka Mawngap Lumparing Village Organization (MLVO) ha ryngkat ka jingïatreilang bad ka Bethany Hospital kumjuh ruh bad ka Bansara Eye Care ka la pynlong ïa ka jingai jingsumar ei ne ka ‘Free Eye & Medical Camp’ ha ka 12 tarik u ‘Naiwieng, 2022 ha Ïingdorbar ka shnong.
Ha kane ka sngi ha shuwa ban sdang ka jingai jingsumar la ïoh ïa ka jingïalang ba lyngkot ha kaba la pynïaid da ka kong Intralis Blah bad bud da ka jingkren na u bah Lamphrang Blah, MDC ka thaiñ uba long ruh u shongknor ka KHADC ha kaba u la ong ba ka jingpynlong ïa kum kane ka jingsumar ei ka long ka jingmyntoi ïa ki nongshong shnong ka thaiñ.
Nangta, u bah Auspicious Lyngdoh u la pynpaw ba lyngba kine ki jingai jingsumar ka ïarap ïa kiba bun ban mih shakhmat ban sngewthuh ïa ka jinglong jingman ka koit ka khiah ka jong ki. U Dr. Chesterfield Syiem na ka Bethany Hospital u ong ba ka koit ka khiah ka kham kordor ban ïa ka spah ka phew bad ka jingnang jingstad.
U bah Benjamin Warlar-pih, Senior Consul-tant State Outreach Co-ordinator ka Bansara Eye Care u la ong ki khmat ki long kiba kordor ban ïohi ïa kiei kiei sawdong jong ngi bad kumta donkam ban sumar ïa ki. Katba, ka kong Lajied Basaiawmoit, District Mission Manager, NRLM ka East Khasi Hills ka la ong ka spah ka phew kan lut noh lada kim don ka jingkoit jingkhiah kaba janai.
Ha ka jingkren jong u bah Staising Kharbteng uwei na ki ‘riew rangbah ka thaiñ uba long ruh u Sub-Inspector of Schools u la kren shaphang ki jingma bad jingktah u drok ïa ka koit ka khiah bad ka jingkiew shaphrang ki khun samla. U la ong ruh ba ki khun samla ki dei ka nongmuna ïa ka jylla bad ka ri, kumta ki dei ban kiar na utei u jingdih uba sniew bad da kaba kyntu ïa baroh ki nongshong shnong ban shimkhia ban rat dyngkhong ïa u bad batai ruh ïa ki daw ka jingngop kiba bun balang ha ki jingdih ba pynbuaid.
La ïoh ruh ïa ka jingkren na u bah Rajesh Sohmat, Block Projects Manager ka NRLM Mawphlang Block, u bah Mainlang Lyngdoh Marshillong, Rangbah Shnong bad ka kong Badabet Lyngdoh Maw-phlang kaba la ai ïa ki kyntien ai khublei.