Shillong, Rymphang 11 : Ka Committee ba la khlieh da u (Rtd) Justice BP Katakey ne ka Katakey Committee jong ka ïing Bishar High Court jongka jylla ka la ai jingmut ban khangdam noh ïa palat 19 tylli ki karkhana coke kiba don ha ki lai tylli ki District hapoh ka Jylla Meghalaya.
“Ka Committee namar kata, ka ai jingmut ban pynmih ïa ka jingbthah sha ki Deputy Commissioner (DC) ka East Jaintia Hills, West Khasi Hills bad South West Khasi Hills ba kin pynthikna ïa ka jingkhangdam noh ïa ki 19 tylli ki karkhana coke (kat kum ki kot ki sla bala ai da u Member Secretary, MSPCB lyngba ka shithi ba 02/02/2024, tad haduh ba kin da ïoh ïa ki CTO kiba treikam” ong u Justice (Retd) BP Katakey ha ka interim report ba arphew, ba la aiti sha ka ïing Bishar.
Ka Committee kala ai jingmut ruh ban tian bishar ban pynmih ïa ka khajna ba la dawa na ki 3 tylli ki karkhana coke, kiba haduh mynta kim pat jubab ïa ka demand notice lane khlem pat siew ïa ka pisa.
Ka Tnad Mining & Geology ka la pyntip sha ka Committee halor ka jingïaid jong ka audit ïa ka jingïoh dewiong jong kine ki karkhana coke jong ka Ferro Alloy Plant bad Captive Power Plant jong ki karkhana dewbilat ha Jyla, kaba la khmih lynti ban pyndep hapoh ka shibnai.
Ka Committee ka la pyntip ruh ba ha ka por ba leh audit ïa ka thymmei jong u dewiong ba pyndonkam ki karkhana coke ha Jylla, la shem ba 8 tylli ki karkhana kila pyndonkam da u dewiong ba beaiñ, ha kaba ïa ka khajna ym shym la siew satia bad kumta la dep ai demand notice sha ki, ïa kaba 5 tylli ki karkhana kila dep siew ïa ka khajna kumba buh, kawei pat kala pynpaw ïa ka jingkloi ban siew katba 2 tylli kim shym la jubab satia ïa ka notice.
