Jowai, Nailur 03: Ka Pnar Student Movement (PSM), Central Body, hapoh ka jingïalam u President Rangbah u ma E. Passah bad u General Secretary ma W. Wann, ryngkat bad ki katto katne ki dkhot ka Seng, lem bad ka President ka PSM Women’s Wing, ka Banikas Laban, hynnin ka sngi ki la leit ban ai mynsiem bad ai jingïarap ïa kawei ka longïing kaba mad ïa ki jingeh kiba khraw ha ka shnong Mowluber, Laskeiñ Block, West Jaiñtia Hills District.
Ka Seng kala pynpaw ba tang kane kawei ka longïing kaba la tap da ki phlang bad ka bym shngaiñ ban shong ban sah. Kane ka longïing ka don kumba san ngut ki khun bad kawei na ki khun jong ka la don ha ka jingduna ha ka met, kaba la pynlong ïa ka ban mad ïa ki jingeh naduh ba ka dang khynnah.
Ha ka jingïakynduh bad kane ka longïing, ka Seng ka la ïoh ban sngap bad tip shaphang kiba bun ki jingeh kiba kane ka longïing ka la mad. Na ka liang ka Seng, ka la buh ïa ka jingkyrpad sha ki bor sorkar, khamtam sha ka ophis u Block Development Officer (BDO), Laskeiñ Block, ba kin sngewbha ban peit bniah ïa kane ka longïing bad ban pynurlong ïa ka jingïarap ba donkam.
Na ka liang ka PSM, kala ai jingïarap da ki tin sop ïing ïa kane ka longïing. Ka Seng ka la pynpaw ruh ba kan dang wad ïa ki lad ki lynti kiba lah ban ïarap ban tei ïa ka ïing kaba kham biang bad kaba shngaiñ na ka bynta kane ka longïing.
Ka Seng ka kyntu ruh ïa ki bor sorkar bad ki tnat kiba dei peit ba kin sngewbha ban shimkhia ïa kane ka bynta bad ban ai ka jingïarap kaba donkam ïa kane ka longïing kaba mad ïa ka jingeh kham kloi katba lah. Pynkut ka kyrwoh khublor ba la pyllait da u Publicity Secretary ka PSM, u Khynrow S. Lakiang.
