Nongstoiñ, Nailur, 15: Kum shi bynta ban jingtip sha ki khynnah skul halor ka rukom treikam jong ka FCI ha Nongstoiñ, kumjuh ruh ïa ka rukom buh bad sam ïa u khaw na katei ka jaka, ki bor pynïaid ka FCI Nongstoiñ ha ka sngi thohdieng ki la pynlong da ka jingïalang ai jingpynshai paidbah ha ka Go down kaba don hapoh ka shnong Pyndengrei WKHD.
Na ka liang ki nongtrei ka FCI ki la ïoh ban batai da kaba pyni ïa ki jingtreikam jong katei ka FCI sha ki khynnah ka skul St. Peters Higher Secondary School Pyndengrei, kata naduh ka rukom wan poi u khaw ban pynhap ban buh bha ha katei ka jaka bad haduh ban da sam.
U Depot In-charge u bah D.H Kharkhulia, u la ong ba kane ka prokram ka long shi bynta jong ka jingpynbeit da ka head ophis na Shillong. Kumta na ka liang jong u kum u nongpeit u la ïoh ruh ban ai jingpynshai sha ki khynah halor u khaw fortified rice lane u ta u khaw vitamin.
Lah ban kdew hangne ba ka FCI Nongstoiñ ka dei kaba shakri ïa ki lai tylli ki District kata ka West Khasi Hills, South West Khasi Hills bad ka Eastern West Khasi Hills.
