Nongpoh, Naitung 25: Ban pynshlur bad ban ai mynsiem ïa ki Longkmie ba kin ieng ha la ki jong ki kjat ha ka liang ki lad ioh kam ioh jam lyngba ki kam bapher bapher, ka National Commission for Women (NCW) ryngkat ka jingïatrei lang bad ka Entrepreneurship Development Institute of India (EDII) ka la pynlong ïa ka prokram kyrpang ba la tip kum ka Entrepreneurship Awareness Programme ban ai jinghikai ïa ki Longkmie halor ki lad seng kam seng jam bapher bapher kum ka lad ioh kam ioh jam ïa ki Longkmie.
Ïa kane ka prokram ai jinghikai halor ka Entrepreneurship la pynlong ha ïing Dorbar Hall, Sajer Nongpoh, ha kaba la wan ban plie ïa kane ka prokram da u Rangbah Shnong ka Nongpoh, u Bah Silverster Mynsong ryngkat ka jingdon lang ki riew rangbah bad kynthup ka jingdon lang u Dr. Rinku Das ka EDII. Kumba 50 ngut ki longkmie na Ri Bhoi ki la shim bynta ha kane ka prokram ban lum jingtip halor ka jingpynshai ki riew shemphang kiba ju ai jinghikai halor ki kam seng kam seng jam bapher bapher.
Kumba la pynpaw da u Dr. Rinku Das, uba dei u nongmihkhmat na ka Entrepreneurship Development Institute of India, ka jingthmu ba la pynlong ïa kaneka prokram ai jinghikai kyrpang na ka bynta ki Longkmie, ka long ban pynshlur bad ban ai mynsiem ïa ki Longkmie ba kin ieng ha la ki jong ki kjat ban kyrshan ïa la ka ïing ka sem da kaba kin seng ïa ki jaid kam bapher bapher.
U la pynpaw ruh lyngba ka jingpynlong ïa kane ka prokram kan ai jingmyntoi shibun ïa ki longkmie ba kin tip ïa kita ki lad ki lynti kumno kin shlur ban mih shakhmat na ka bynta ban seng kam seng jam bad kumba long ha kine ki sngi jong ka jingkyrduh kam kyrduh jam ka jingmih shakhmat ki Longkmie ban seng kam seng jam ka long kawei na ka lad ai kam ai jam ïa ki Longkmie.
Haba kren ruh ha kane ka sngi, na ka liang u Rangbah Shnong ka Shnong Nongpoh, u Bah Silverster Mynsong u la ai khublei kyrpang ïa ka National Commission for Women kaba la pynlong ïa kane ka prokram kaba kyrpang ban ai jinghikai ïa ki longkmie ba kin tip ïa kita ki lad ki lynti ban seng kam seng jam.
U la ong ruh lyngba ka jingdon kum kane ka prokram kan ai jingmyntoi ruh ïa ki longkmie ym tang ba kin tip ïa kita ki lad ki lynti ha ka liang ka seng kam ka seng jam bad lyngba kane ka prokram ki ioh jingmyntoi ruh ba kum ki longkmie kin tip ïa ka hok longbriew man briew ba kane ka Commission ka peit kyrpang na ka bynta kabha ka miat jong ki Longkmie hapoh ka jylla bad ka ri.
Shuh shuh, u la bynrap ruh da kaba ong ba kum u nongïalam shnong u kyntu ruh ïa ki longkmie bakin pyndonkam hok ïa ki lad ai jinghikai ba la pynlong ha kane ka sngi bad u khmih lynti ruh ba kum ki longkmie kin dang long ruh kita ki longkmie kiba shlur bad kiba lah ban trei ruh na ka bynta ka bha ka miat jong ka imlang ka sahlang, u la bynrap.
