Ai jinghikai ka MSLSA halor ki lad jingmyntoi na ka NALSA shaphang ka aiñ bad ki lad jingmyntoi na ka sorkar

By Mawphor Editor On Jun 26, 2023

Nongpoh, Jylliew 25: Ban ai jinghikai sha ki paidbah halor ki lad jingïarap bapher bapher na ka sorkar ha kaba ïa dei bad ki kam aiñ, ka Meghalaya State Legal Service Authority, Shillong ryngkat ka jingïatrei lang bad ka tnad Social Welfare, ka tnad ka koit ka khiah ka la shim ïa ka sienjam ban pynlong ïa ka prokram ai jinghikai sha ki paidbah ban pynshai halor shibun ki kam ba ioh jingmyntoi na ka NALSA bad ruh ba la pynbna paidbah ïa kita ki Legal Aid Defense Counsel system ba la pynlong ha Patharkhmah Higher Secondary School ha Ri Bhoi District.
Haba pynlong ïa kane ka prokram ai jinghikai la ïa trei ryngkat ruh naduh ka tnad Community and Rural Development, ka ophis u Commissioner for Persons with disabilities, ka tnad PWD, PHE, Agriculture, Commerce & Industries bad ryngkat ka District Legal Service Authority ka Ri Bhoi District.
Kum ban pynpaw, ka jingthmu kane ka prokram ai jinghikai ka dei beit shaphang kita ki lad ai jingïarap na ka bynta ki paidbah nongshong shnong ka jylla kiba ïa dei bad ki kam aiñ ha kaba ka sorkar ka la plie bun tylli ki lad ki lynti kumno ba kin ioh jingïada lane ka ka hok da ki lad ba kas sorkar ki la pynbiang na ka bynta kito kiba ym kot bor ban don kita ki nongsaitaiñ.
U Chief Justice ka Meghalaya High Court bad uba dei ruh u Patron in-chief ka MSLSA, u Justice Sanjib Banerjee kum u kongsan bad la sakhi lang ruh da ka jingdon lang u Judge ka High Court ka Meghalaya, u Justice H.S Thankhiew, Judge ka High Court ka Meghalaya & Chairman HCLSC, u Justice W.Diengdoh, ka kong B.Mawrie, ka District & Session Judge cum Chairperson DLSA, Nongpoh, ka Kong H.C Lyndem, Director ka Health Services (MI), u Bah L.Lyngdoh, Deputy Director ka ntad Social Welfare bad kiwei kiwei ki ophisar na ki tnad sorkar bapher bapher ka sorkar jylla.
Haba ai jingkren ha kane ka sngi kum u Chief Justice ka Meghalaya High Court, u Sanjib Banerjee, u la ai ka jingïaroh ïa kane ka sienjam ba la shim da ka Meghalaya State Legal Service Authority bad kiwei kiwei ki tnad sorkar ha kaba ka jingpynlong kum kine ki jaid prokram ka ai jingmyntoi shibun eh ïa ki paidbah ba kin tip ïa ka hok ba ki ioh ïa shibun ki lad jingmyntoi la ka dei bad ki kam aiñ ne ki kam pynroi ha ka imlang ka sahlang.
U la pynshai ruh sha ki paidba halor ka jingthmu ka NALSA ban ai jingïarap sha ki paidbah kiba ym kot bor ban ïa khun ïa la ka hok ha ki kam aiñ, hynrei ki dei ban tip ba ka sorkar ka la pynkhreh na ka bynta kito kiba ym kot bor ba la tip kum kita ki legal aid counsel ban ïa said na ka bynta ka hok jong ki la ka dei ha kano kano ka ka aiñ ban ioh ïa ka jingbishar kaba hok.
U la pynshhai ruh ba la buh khnang ïa ka Legal Service Authority ka dei ruh kawei naka thong jong ka sorkar ban pynthikna ba ki paidbah kim dei ban shah khñiot ne ban beit bad ki dei ban ioh ïa ka jingbishar kaba hok bad kumjuh ka jingïaryngkat ban ioh ïa ka jingbishar hakhmat ka aiñ.
Shuh shuh, u la kyrpad ruh ïa ki paidbah ba ki dei ban tip ïa la ka hok ba ka sorkar ka la thaw ki lad ki lynti sha baroh ki paidbah nongshong shnong ba ki ioh ïa kata ka hok lada ki poi sha ka kam aiñbad bunsien kiba bun kim tip khamtam ka jingdon ka Legal Service Authority ka dei kawei na ka lad ban ai jingïarap sha ki paidbah ha kaba ïa dei bad ki kam aiñ, u la bynrap.
Ha kane ka sngi la pynkut ruh ïa kane ka prokram ai jinghikai shaphang ki kam aiñ da kaba sam ïa ki tiar kum ki wheelchair, elbow crutch bad kiwei kiwei ki tiar sha kiba don jingduna ha ka dkhot met bad la sam ruh ïa ka cheque kaba T. 90, 000 sha ki 15 ngut kiba ioh jingmyntoi na ka skhim ba la tip kum ka Silk Samagra ba la bei tyngka da Central Silk Board, Ministry ka tnad Textile.