Jowai, Nailar 28: Ka Indian Red Cross Society, West Jaiñtia Hills Unit ha ka thong ban pynkhlaiñ ïa ka rukom treikam hapoh ka District, kala pynlong ïa ka prokram ‘First Aid Training’ na ka bynta ki nonghikai bad ki khynnah skul kaba la sdang naduh ka 27 tarik haduh ka 29 tarik u Nailar ha ïing Dorbar ka Lion Mission Compound Dorbar Shnong, Jowai.
Haba sdang ka jingïalang la pynïaid ïa ka prokram da ka S.Tariang, Senior Life Member IRCS, ha kaba u W. Lyngdoh, Chairman IRCS, West Jaiñtia Hills ula long kum u kongsan bad la ïoh ka jingkren pdiang da ka Emidaka Lyngdoh, Organiser Junior Red Cross Society, WJH, ka jingkren shaphang ka Junior Red Cross bad ka Youth Red Cross na u ma O. Laloo, Secretary IRCS, West Jaiñtia Hills katba u bah H. Khongstia, Life Member IRCS ula ai ki kyntien ai khublei.
U ma O.Laloo ula pynsngew ba ka thong jong kane ka prokram ka long ban khring ïa ki khynnah skul bad ki khun samla ban ïadon bynta lang bad ka Indian Red Cross haka liang ki Junior Red Cross bad ki Youth Red Cross. Shuh shuh ula pynsngew shaphang ki nongrim treikam jong ka Indian Red Cross Society kum kawei na ki seng treimon sngewbha kaba don hapoh ka Ri India kaba ai jingshakri ha kiba bun ki liang.
Naka liang u W. Lyngdoh, Chairman IRCS, West Jaiñtia Hills ha ka jingkren kum u kongsan ula ong pynsngew halor ka Pledge jong ka Indian Red Cross Society bad shaphang ki 4 tylli ki nongrim jong ka Red Cross Society kiba ong ‘Care of your own health and that of other, Understanding and acceptance of civic responsibility, Maintenance the spirit of friendly, helpfulness towards other children in our country and all over the world Dissemination Red Cross Movement’.
Ha kane ka prokram ‘First Aid Training’ la wan ban ai jinghikai da ki riew shemphang jong ka Indian Red Cross Society na Shillong kiba kynthup ïa P. Deb, Albert CL Nongrum, ka MGR Shabong bad ka Ibanylla Swer, naka liang ki khynnah skul kiba wan ban sha kane ka jingai jinghikai ki kynthup na Kiang Nangbah Govt, Higher Secondary School, Jowai, Thomas Jones Hr. Secondary School, Jowai, St. Mary Mazzerllo Hr. Secondary School, Jowai, Govt. Boys Hr. Secondary School Jowai, Govt. Girls Hr. Secondary School Jowai, KJP Synod Mihngi Hr. Secondary School, Jowai Presbyterian Secondary School, Seiñraij Hr. Secondary School, Jowai, Thadlaboh Presbyterian Hr. Secondary School, St. Michael & All Angel’s Sec. School, Modern Secondary School, Ialong, Mookyndur Secondary School bad ka Little Angels Secondary School, Jowai.
