Shillong, Lber 24: Ka Drug Reduction Elimination & Action Mission (DREAM) ryngkat ka Tnad Pulit ka Jylla, ka la pynlong ïa ka jingai jinghikai ïa ki Village Defence Party (VDP) ban pynsngewthuh ïa ka bynta ba ki dei ban leh ha ka jingïakhun pyrshah ïa u drok hapoh ka Jylla.
Ïa kane ka jingai jinghikai la pynlong ha Conference Hall jong ka Directorate of Social Welfare, Lachumiere ha ka jingïadon ryngkat u Superintendent of Police ka East Khasi Hills Bah Vivek Syiem, ki VDP na EKH, ki Rangbah Shnong, ki Seng Longkmie, ki Seng Samla bad kiwei kiwei.
Kane ka jingïalang ka long kum ka rynsan kaba kongsan ban ïakren ïa ka bynta bad ka jingtreikam jong ki VDP ha ka ban tehlakam ïa ka jingdih drok bad ki kam runar kiba ïadei bad u drok ha ka District bad ka Nongbah Shillong baroh kawei. Kumba 80 ngut ki nongïashimbynta ki la wan na ki shnong/dong bapher-bapher bad ki VDP.
Ki nongïashim bynta ki la ïatai, ïathir bad ai jingmut halor ki jingeh ba ki shem bad kumno ban wad lad, wad lynti ban tehlakam ïa u Drok ha ki shnong ki thaw.
Ki jingïakren ki la pynpaw ïa ka jingdonkam jong ka jingïashim bynta lang jong ki paidbah, ka jingïatreilang bad ki bor pynjari aiñ, bad ki jingpynsngewthuh paidbah ha kaba ïaleh pyrshah ïa ka jingdih drok.
U SP, Vivek Syiem u la ïaroh ïa ka jingpyrshang jong ki VDP bad ban pynkhlaiñ ïa ka jingïatreilang kaba neh bad ki lad ki lyni kiba shimkhia ban ïada ïa ki dong jong ka Distrik bad khamtam ka nongbah Shillong.
