Khliehriat, Naiwieng 2 : Shi bynta jong ka Pan India Awareness & Outreach Campaign, ka District Legal Services Authority (DLSA), East Jaiñtia Hills District, Khliehriat ha ka 1 tarik mynta u bnai kala pynlong ïa ka jingpynshai ha kaba ïadei bad ki kyndon aiñ hapoh ka phatok, ka District Prison & Correctional Home, Jowai.
Kane ka prokram ka thmu ban pynshai ha kaba ïadei bad ki hok jong ki koidi kiba dang don hapdeng ka jingshah tian bishar kumjuh na ka bynta kito kiba la shah pynngat. Haduh kumba 200 ngut ki dkhot na ka phatok kila wan ïashim bynta ha kane ka prokram.
Na ka liang ka Ms. N.M. Momin, Chief Judicial Magistrate cum Secretary, District Legal Services Authority (DLSA), East Jaiñtia Hills District, Khliehriat kala pdiang sngewbha ïa baroh ki nongïashim bynta bad ai ruh ka jingkren kaba bniah ha kaba ïadei bad ka jingthmu jong kane ka jingpynshai paidbah.
Ki nongai jingkren ba kongsan ha kane ka sngi ki kynthup ka Kong P. Paswett, Advocate bad u Bah R. War, uba dei u Panel Lawyer, District Legal Services Authority (DLSA), East Jaiñtia Hills District kiba la kren halor ki hok jong ki koidi, ka jingkyrpad na ka jingshah pynngat sha ki ïingbishar kiba kham shalor, ka jingpyllait kloi ïa ki koidi, ka jingïateh ban pyllait ïa ki koidi, ka jingtreikam jong ki aiñ hapoh ki phatok bad kiwei kiwei.
Ha kane ka prokram kala don ruh ka jingïamir jingmut bad ki koidi bad ka Secretary jong ka District Legal Services Authority (DLSA), East Jaiñtia Hills District, Khliehriat kaba la pynthikna ruh halor ki jingïarap ei na ka bynta ki koidi ha kaba ïadei bad ki jingdonkam halor ki aiñ ki kanun.
La pynkut ïa kane ka prokram da ka jingai khublei na ka Ms. N.M. Momin, Chief Judicial Magistrate cum Secretary DLSA, East Jaiñtia Hills District, Khliehriat.
