Nongpoh, K’Lyngkot 11: Ka Central Silk Board (CSB) lem bad ka Muga Eri Silkworm Seed organisation (MESSO), Guwahati haka sngi thohdieng kala pynlong ïaka prokram ai jinghikai halor ka Central Seed Act naka bynta ka P-3 Unit Nongpoh bala pynlong ha Mawdiangum naka bynta ki nongrep bad nongri khñiang Ryndia bad Muga na Ri-Bhoi District.
Ha katei ka prokram la wan ban shim bynta da u Dr. N.K. Bhatia, Director, CSB, MESSO, Guwahati, kum u kongsan, ki senior Scientist ba kynthup ïa u Dr. B.N. Sarkar, Dr. Mahananda Chutia, bad Dr. Lopamudra Guha na CSB, MESSO, Guwahati, ka kong R.B. Lyngwa, District Sericulture Officer bad kiwei kiwei.
Haba kren maitphang ha katei ka sngi naka liang u Dr NK Bhatia kum u kongson u la batai bñiah halor ki kyndon bad ki aiñ jong ka Seed Act, da kaba pynleit jingmut ruh ban nang pynbha bad pynjanai ïaka kam ri khñiang bad kyntu ïa ki nongïashim bynta ban pynrung kyrteng hapoh kane ka aiñ ban pynthikna ïa ka jingbud ryntih ïa ki kyndon jong ka, ban ïoh jingmyntoi na ka jingpynrung kyrteng kaba pura ha ka web portal.
Ïa kane ka prokram la pynkut da ka jingïa mir jingmut, ha kaba ki nongrep ki la ïashim bynta ha ki jingïakren halor ki kyndon, ka rukom pynrung kyrteng, bad ki jingdonkam ban bud ryntih katkum katei ka aiñ.
