Ai ba ki nongïalam barim kin wan pynïasoh hi dalade sha ka party, ong u Chellakumar

Shillong, K’ Lyngkot 11: U Nongïalam ka AICC uba khmih ïa ka Meghalaya u Dr A Chellakumar ha ka sngi Saitjaiñ u la ong ba ka party kam pat shym la phah kano kano ka jingpyrkhat jingsngew ban khot biang ïa ki nongïalam barim kiba kynthup ïa u nongïalam ka liang pyrshah bad u nongïalam ka AITC u Mukul Sangma.
“Em ngi khlem pat phah kano kano ka jingpynsngew ïano ïano hynrei la don mano mano kiba kwah ban pynïasoh sha ka Congress party, ngi pdiang sngewbha,” ong u Dr Chellakumar sha ki lad pathai khubor. Ïa kane u la jubab ïa ka jingkylli la ka party ka thmu ne em ban khot biang ïa ki nongïalam barim ban pynïasoh biang sha ka party.
“Nga kwah ba baroh ki briew jong ka Congress kin wan phai biang sha ka Congress ban pynkhlaiñ biang ïa ka Congress ym tang na ka bynta ka bha ka miat jong ka Congress hynrei na ka bynta ka bha ka miat jong ka jylla Meghalaya bad kumjuh ruh na ka bynta ka ri,” ong u incharge ka AICC.
Haba ong ba ka Congress ka ïai buddien ïa kino kino ruh, u Dr Chellakumar u la ong, “Baroh ki tip kaei kaba jia ha ka ri mynta kumta ngi pdiang sngewbha ïa ka hynrei ngin ym pynbor ïano ïano bad ngin ym beh kthong nadien ïano ïano ruh. Lada mano mano ki kwah ban pynïasoh ai ba kin wan hi dalade shakhmat.”
Haba kylli u la ong, “Ha kaba nyngkong eh baroh ki nongïalam barim ki dei ban pyrkhat bha, bad ai ba kin wan haba shit ba shai hangta ngin sa ïapeit ïa kata.”