Shillong, Nailar 28 : Ka Khun Hynniewtrep National Awakening Movement (KHNAM) hynne ka sngi ka la phah da ka dorkhas sha u Chief Secretary ka jylla haba ïadei bad ka rai jong ka Kynhun Myntri ban thung ïa u Chairman bad dkhot jong ka Expert Committee ban bishar bniah ïa ka Reservation Policy jong ka jylla.
Ha katei ka dorkhas, ka KHNAM ka la ong ba ka don ka jingïapher haba ïadei bad ka rai ba la shim ha ka All Party Meeting ha ka 31tarik Jymmang, 2023 bad ki kyndon treikam ba la tyrwa da ka kynhun myntri.
“Lah ban pynkynmaw ba ha ka jingïalang jong baroh ki seng saiñpyrthei ha ka 31tarik Jymmang, 2023 la shim ïa ka rai ban thaw ïa ka EC na bynta ban bishar bniah bad pynkylla ïa ka Reservation Policy 1972 ha kaba ka kyndon ka long ban bishar bniah ïa kane ka Policy ba mynta bad ai jingmut ruh ban pynbha shuh shuh, lada donkam,” ong ka dorkhas.
Ka KHNAM ka dawa ruh ba ïa katei ka kyndon treikam jong ka EC dei ban long kaba shai bad kata ka long ban pynshisha ïa ka jingai jingmut kaba ki la ïoh pdiang na ki seng sainpyrthei bad ka jingai jingmut ban pynbha ïa ka State Reservation Policy.
Shuh shuh ka la ong ruh ba katei ka kyndon kaba ar ba la tyrwa da ka kynhun Myntri ka long ban leit syllok bad ki paidbah kylleng ki jaka jong ka jylla ban ïoh ïa ka jingsngew jong ki. “Ngi ïohi ba kane ka kyndon kaba ar ka long tang ka buit ban pynslem kaba ym don jingmut ei ei. Ngim ïohi ba da donkam ïa ka EC ban da pynlut por bad pisa ban leit kylleng ki jaka. Ngi ai jingmut ba ïa ki paidbah ba kin lah ban phah hi ïa ki jingai jingmut sha ka EC ha ka por ba la buh bad ban bishar bniah bad pynshisha bad kane kan ailad ïa ka EC ban pyndep ïa ka kam hapoh lai bnai,” ong ka KHNAM ha ka dorkhas.
Nalorkata, ka la ai jingmut ruh ban thung lang ïa ki trai jylla ha ka EC khnang ba kin lah ban ïoh jingshai shaphang kiwei kiwei ki bynta kiba ïadei bad State Reservation Policy bad ka jingthrang jong ki paidbah ba bun.
