AFC Asian Cup 2027 Qualifier: Pynïakhaid u Rahim Ali ïa ka India ban ïasam poiñ bad ka Singapore

Kallang, Risaw 09: Ka kol kaba la wan dier por jong u Rahim Ali ka la pyllait ïa ka India na ka namrem, ha kaba ka la ïakhaid noh da mar 1-1 kol bad ka Singapore ha ka jingïalehkai ïa ka kylla kaba lai (3rd round) jong ka AFC Asian Cup 2027 Qualifier, ha National Stadium ha Kallang ha ka janmiet jong ka sngi palei.
Da kane ka jingïakhaid, ka India ka la kiew sha ka kyrdan ba lai ha ka Group — da kaba kamai 2 poiñ — katba ka Singapore ka dang ïaineh ha khlieh duh ryngkat ki 5 poiñ hadien lai tylli ki jingïakhun.
“Ha ka jingkheiñ jingdiah, ngi dang don ka lad ban ïoh rung (sha ka AFC Asian Cup 2027). Ngi dang sah sa lai tylli ki jingïalehkai hynrei ngin shim ïa kawei ka jingïalehkai hadien kawei pat,” la ong u nongthep kol ba bun tam jong ka ri India, u Sunil Chhetri, hadien ba la kut ka jingïakhun.
Ka la long ka jingïalehkai kaba la sakhi ïa ki kol kiba la thep dier por — ha baroh ar kylla — kaba la kut ha ka jingïasam mar shi poiñ, ha kaba u Ikhsan Fandi u la pynkhihjar ha ki minit pynjlan shuwa ban kut ka kylla step (45+1’). U Fandi, uba la thep ruh ïa ka kol ha ka jingïakhun kaba mynshwa pyrshah ïa ka India ha u snem 2022, u la bteng ban long ka jingma naduh ba sdang ka jingïalehkai bad u la ïoh ban pyndei tiak ïa ka bol pashat jong u Shawal Anuar ban pynlong ïa ka Singapore ban lamkhmat.
Ka miet ka la nang sniew shuh shuh na ka bynta ka India haba u rangapdien ba pdeng jong ka kynhun u Sandesh Jhingan, u la shah beh noh hadien ba u la ïoh ar tylli ki yellow card, tang ar minit mar ïa sdang ïa ka kylla miet.
“Na kaei kaba nga lah ban ïohi, ka dei ka rai kaba 50-50 hynrei haba ngi la dei ban ïalehkai duna sha ka 10 ngut, ngi hap hi ban ïalehkai da 10 ngut,” la ong u Chhetri.
Hynrei, ka jingsngewhun jong ka Singapore ban lamkhmat da tang shi kol — ka la pynlong ïa u Rahim ban ïoh thep ïa ka kol ba nyngkong eh jong u ha ka minit ba khatduh jong ka por ba la buh (90’).
Haba mih madan kum u nongbujli, u Rahim u la bteng ban tur shakhmat bad ka jingbakla jong u nongap kol ka Singapore u Izwan Mahbud ka la ailad ïa utei u rangïalehkai ba shakhmat jong ka India ban knieh ïa ka bol bad thep jlang sha kol, ban pynïakhaid ïa ka jingïalehkai.
“Ka long kaba sngewsih bha ban shah thep ha ki minit ba khatduh. Ngi la tehlakam bunshah ïa ka jingïakhun baroh kawei. Ngi la dei ban pynkhlaiñ shuh ha ka por ba ki (India) shah pynduna sha ka 10 ngut,” la ong u Harris Harun, kapten jong ka Singapore.
Kine ki arliang mamla kin ïakynduh ha ka wat ïakhun ban wan jong ka Asian Cup Qualifiers haba ka India kan pdiang ïa ka Singapore hala ïing, ha ka jingïalehkai ban long ha Jawaharlal Nehru Stadium ha Goa ha ka 14 tarik u Risaw.