Jowai, Naitung 10: Ka Jaiñtia Student Union (JSU) naduh ka seng kmie ha ryngkat lang bad shnat treikam jong ka baroh ki Circle bad ki Unit ka ai khublei kyrpang bad ka kitbok kit rwiang ïabaroh ki khun ki hajar jong ka ri Jaiñtia khamtam ïaki khun ka Ñiamtre ki ban sa pyndep ïaka lehñiam Behdieñkhlam jong ki ha une u snem.
Ka seng JSU ka lah ong ruh ba kane ka Behdieñklam jong u ne u snem ba mynta kan long shisha kaba shongkhia shongkun namar ha kine ki ar snem ba lah dep ym shym lah ïoh ban pynlong kumba ju long namar ka khlam Corona.Ka seng ka ong ai ba kane ka jinglehñiam Behdieñkhlam kaba mynta kan warah shisha ïaka jing kyrkhu kyrdoh na u Trai Kynrad khnang ba baroh yn ïoh ïaka shait ka khiah kaba bha, ban bha ka kamai kajih, ka pule puthi bad ban ïoh ruh ka jingshong suk ha baroh ki liang hapoh ka imlang ka sahlang.
