Rakhe ka High Court ïa ka Republic Day da ba pyni jingriew spah ki kolshor ka jylla

Shillong, K’ Lyngkot 27: Ka Ïingkashari High Court ka Meghalaya ka la rakhe ïa ka Republic Day kaba 77 ha la ka jaka treikam jong ka, kaba long kum ka dak ka jingïashim bynta lang bad ka ri baroh kawei.
Ïa ka Lama Lai rong jong ka ri la kyntiew da ka Chief Justice jong ka High Court ka Meghalaya, ka Justice Revati Prashant Mohite Dere, ha ka jingïadonlang u Justice H.S. Thangkhiew, Justice W. Diengdoh, Justice Biswadeep Bhattacharjee, bad ki nongtrei jong ka High Court.
Ha kane ka jingrakhe la pynlong ïa ki prokram bapher bapher ba kynthup ïa ki prokram riti dustur ba la pynlong ha Auditorium, ha kaba ki riew shemphang na kylleng ka jylla ki la pyni ïa ki jingriewspah jong ka riti dustur ka Meghalaya bad ki jinghiar pateng jong ka lyngba ka jingshad Mastieh, Wangala Dance, bad Shad Pliang.
Ha kane ka prokram la don ruh ka jingai jingrwai da Advocate jong ka High Court ka Meghalaya, bad ka jingai ïa ka prokram kolshor da ka Khmieh Creative Society.