Rai ka BAC ba ka dorbar mang tyngka kan sdang naduh ka 16 haduh 27 tarik u Rymphang

Shillong, K’Lyngkot 27: Ka Business Advisory Committee (BAC) jong ka ïing dorbar thawain ka jylla Meghalaya kaba la shong jingïalang ha kane ka sngi Ba-ar ka la shim ïa ka rai ba ka dorbar mang tyngka jong ka ïing dorbar thawain ka jylla kan sdang naduh ka 16 tarik haduh ka 27 tarik u Rymphang 2026.
Ïa kane ka jingïalang la pynïaid da u Lamphang ka ïingdorbar thawaiñ ka jylla Meghalaya u Thomas A Sangma, ha kaba la ïa donlang ruh da u Symbud Myntri Rangbah ka Jylla ba dei peit ïa ki ka Parliamentary Affairs u Bah Prestone Tynsong.
Ha kane ka ïalang la wan ban ïa shim bynta lang da u nongïalam ka liang pyrshah u Dr. Mukul Sangma bad u Bah Paul Lyngdoh uba dei u dkhot lyngba ka Online Mode.
Ha kane ka jingialang la donlang ruh u Bah Cyril V. Darlong Diengdoh, Commissioner&Secretary ka tnad Parliamentary Affairs, u Dr. Andrew Simons, Commissioner & Secretary ka Ïing Dorbar Thawaiñ ka Jylla Meghalaya, bad u Malthus S. Sangma, Secretary ka Ïingdorbar Thawaiñ ka Jylla Meghalaya.
Haba pyntip shaphang ki jingtip ba bniah jong ka dorbar, u Lamphang u la pynpaw ba ka dorbar kaba shiphew sngi kan kynthup ïa ki hynniew sngi kan dei ka Government business bad lai sngi kan dei Private Members’ business.
Shuh shuh u la pyntip ba ïa ka mang tyngka jong ka Jylla yn sa wanrah ha ka 20 tarik u Rymphang, 2026.
U Lamphang u la bynrap ba lah ban pynjlan ïa ki por shong dorbar, lada donkam, khnang ba ki dkhot kin lah ban ïashim bynta hok ha ki jingïaid jong ka Ïing Dorbar.U la pyntip ruh ba ha ka sngi ba shim ïa ka Supplementary Demand for Grants, yn pynjlan ïa ka jingïashong dorbar haduh ka por 3 baje janmiet.