Nongpoh, K’Lyngkot 27: Ka jingjia aksiden kaba shyrkhei kaba la jia haka shnong Mawdiangum ha Ri-Bhoi District kaba la wanrah ruh ka jingjia ba sngewsih haduh ba 2 ngut ki longkmie kila duh noh ïa la ka jingim bad katkum ka jingtip ba la ïohlum la ïathuh ba kitei ki 2 ngut ki longkmie kiba la khlad noh ki dei shikmie shikhun.
Kum ban shu pynpaw hangne ba katei ka jingjia aksiden kaba shyrkhei ka la jia ha ka 25 tarik mynta u bnai ha surok bah NH6 ha ka shnong Mawdiangum ha Ri-Bhoi ha kaba kawei ka Maruti Alto kaba don ïa u Registration number ML 05 Y 4464 ba la ñiah da u Bah Khem Nongrum ryngkat bad 2 ngut ki longkmie kiba dei ruh ka lok bad ka khun kynthei jong u lem bad iwei i khyllung ba dang 2 snem ka rta. Ki dang mih na ka shnong Umsamlem ban leit sha 20 mer hynrei ynda poi ha ka shnong Mawdiangum, u kpa katei ka ïing u la leit ban tynrah ïa kawei ka trok kaba don ïa u number AS 01 RC 5327 kaba dang ïeng harud surok haduh ba ka kali kaba ki shong ka la rung syndon sha khrum ka trok bad 2 ngut napdeng jong ki, ki la khlad noh.
Kitei ki 2 ngut ba la khlad noh ha kane ka jingjia kidei kiba la tip kyrteng kum ka kong Lucia Nongsiej kaba dei ka kurim jong u Bah Khem Nongrum u ba ñiah ïa katei ka kali, lem bad ka kong Ridahun Nongsiej kaba dei ka khun kynthei jong ki, katba u Bah Khem Nongrum u ba dei u kpa lem bad i khyllung ba dang 2 snem kila mynsaw jur bad kitei ki shi ïing kiba la ngat ha katei ka jingjia ba sngewsih ki dei na ka shnong 20 mer.
Shuh shuh la ïoh jingtip ruh ba kane ka jingjia ka la jia tang namar ka jingpynher sted palat u nongñiah katei ka Alto, bad ha kane ka jingjia u nongñiah kane ka trok u la phet krad na katei ka jaka, na ka liang ki pulit ka Nongpoh Traffic Police ki dang pynlong ka jingtohkit halor kane ka jingjia.
