Yn pynkhlaiñ ïa ki VDP ha ki shnong khappud bad ka Bangladesh ban ym ïoh wan rung ki mynder sha jylla : Dy CM

Shillong, Kyllalyngkot 27 : Ka Jylla Meghalaya kala shim ïa ki sienjam ban tehlakam ïa ka jingwan rung tuh ki mynder ri, da ka jingthmu ban pynkhlaiñ ïa ki Village Defence Party (VDP) ha ki shnong khappud bad ka Bangladesh.
Haba pynbna ïa kane ha ka sngi Ba-ar, u Symbud Myntri Rangbah ba khmih ïa ka kam Pohïing u Bah Prestone Tynsong ula ong “Lada phi ïakren ïa ka jingrung tuh ki mynder ri, kane ka dei ka sobjek jong ka Sorkar Pdeng bad kam dei ka sobjek ka Jylla hynrei ngan ïathuh ha phi kawei ba namar ka jinglong jingman ba mynta ha Bangladesh, ngi la rai kum ka Sorkar Jylla ba ngin pynkhlaiñ ïa ka jingtreikam jong ki VDP ha ki shnong khappud ka Bangladesh bad ki Jylla ba marjan”.
Haba kylli la ka Sorkar ka don jingthmu ban ai tiar siat sha ki VDP, u Bah Prestone ula ong “Ym dei eh ka tiar siat hynrei ngin ai sha ki ïa ki jinghikai pyntbit. Ngi don ïa ki jingai jinghikai bad ngin sa peit ruh kiei ki jingdonkam ba donkam hakhmat eh. Ngin sa ai jinghikai shuh shuh ïa ki VDP khnang ba kin lah ban ïakhun pyrshah ïa ka jingrung tuh ki mynder ri”.
U Symbud Myntri Rangbah ula pyntip ruh ba ka Jylla kala shim ïa ki sienjam ban leh tyngeh pyrshah ïa ki mynder ri ba rung tuh kat kum ki aiñ kiba la don lypa.
Ula kular ruh ïa ka jingshngaiñ ki jaka khappud bad ong “ïa mynta, ngi long kiba shngaiñ. Ryngkat lang, ki BSF bad ki Pulit ka Jylla kila peitngor bha bad la bthah ïa ki bor District ba kin shim ïa ki sienjam ba donkam haba ki ïoh pdiang ïa kino kino ki khubor”.
Halor ki sienjam ban husiar namar ka elekshon ha Bangladesh, u Bah Prestone ula ong “Ngi la shim ïa ki lad jingïada kam pher la ka don elekshon ne em”.