Shillong, Kyllalyngkot 27 : Ka jingtei ïa ka ïing Dorbar Thaw Aiñ ba thymmai ha Mawdiangdiang ka la jan dep artad ha kaba bun ki jingshna ba shabar ki la dep bad ki jingshna ba shapoh ki dang ïaid mynta, ong u Lamphang ka ïing Dorbar u Thomas A Sangma ha ka sngi Ba-ar.
“Ki jingshna ba shabar ki la dep lut. Kumba phi lah ban ïohi na shabar, ki la dep, hynrei ki kam ba shapoh ki dang ïaid mynta” ong u Thomas.
Ki kam ba shapoh ki kynthup ïa ka jingpyndait ïa ki Audio-Visual System, ki CCTV bad ki wiring.
Haba kylli ïa ka por ban pyndep ïa ka project, u Thomas ula ong “Ka jingbuhpor ban pyndep ha u Jylliew ka dang ïeng mynta. Ngi la pyrshang kat kaba lah ban pyndep hapoh ka por ba la buh”.
Ula pyntip ba shen ka High-Powered Committee kan sa ïakynduh shen ha Mawdiangdiang.
