Mynta u Lber yn plie noh ïa ka surok na lad Assembly ban mih sha Umshyrpi

Shillong, K’Lyngkot 25 : Ka shimpor haduh 8 bnai ïa u MLA ka Shillong South Bah Sanbor Shullai ban ïoh ïa ka No Objection Certificate na ka tnad Ïada Ri jong ka Ri na ka bynta ban ïoh shna noh ïa ka surok na lad Iing Dorbar Thawain ka Jylla kaba ha Rilbong ban mih pat shaduh jingkieng Umshyrpi.
Ïa kane la ïathuh da u Bah Sanbor ba dei ruh u Myntri ka tnad Arts and Culture hadien ba la dep ban jurip ïa ka jingpyntrei ïa kane ka surok kaba la ïaid shaid shaid mynta ha ka jingmang pisa kaba kot sha ka 6 klur tam. “Nga la ïakynduh dalade ïa u Myntri ka kam Ïada Ri ban ïoh ïa ka No Objection Certificate ban pyndonkam ïa ka jaka na ka bynta ka surok ban pynïasoh na lad Assembly sha Umshyrpi”.
Nalorkata, u ong ruh ba la kumno kumno ha u Lber mynta u snem kin plie noh ïa kane ka surok kaban long ka jingkyrkhu kaba khraw ïa ki paidbah nongleit nongwan khamtam na ki phra tylli ki Dorbar Shnong jong ka constituency kiba ju kynduh ïa ka dheng kali man ka sngi khamtam ha ka por beh kam.
U MLA u la ïathuh ruh ba man ka por ki nongïalam shnong na kine ki phra Dorbar Shnong ki ju kynduh ban ïa kren halor ka dheng kali ha ki bynta jong ka Civil bad kumjuh ha Rhino Point kaba la ktah jubor bha ïa ka leit ka wan khamtam ha ka por mynstep ba beh skul bad beit leit college.
“Ynda la dep kane ka surok kiba beh kam ban leit skul ne leit klas kumjuh kito kiba donkam ban leit sha thain Upper Shillong, sha Sohra bad kumjuh ban leit sha Mawlai ne lynti Guwahati ka shimpor tang shi minit ar minit lyngba kane ka surok ban poi sha ka surokbah,” u la ong.
Halor kane, u Bah Sanbor ula ai khublei ïa ka jingshimkhia jong u Myntri Rangbah ka Jylla Conrad K Sangma bad kumjuh u Symbud Myntri Rangbah, Bah Prestone Tynsong kiba la shimkhia ïa kane ka kam haduh ba kan da urlong.
Shwa jong kane, u Bah Sanbor u la leit ruh ban jurip ïa ka jingpyntrei ïa ka Rabindranath Tagore Cultural Complex ha Rilbong, ha kaba u la pyntip ba na ka liang ki Engineer ka PWD ki la pynthikna ba kin pyndep noh ïa kane ka projek kaba kot sha ka 13.58 klur tyngka hapoh 8 bnai.
Katkum ka jingïathuh jong u, ïa kane ka Complex la bei tyngka da ka Cultural Ministry jong ka sorkar pdeng ha kaba la buh ba yn don lang naduh ka Museum, Restaurant, Children’s Park, Amphitheatre bad kiwei.
Shuh shuh u ong ruh baroh shi katta ki paidbah na ka thain haba ki pynlong ïa kino kino ki prokram kiba kham heh ki hap ban leit pynlong ha Soso Tham Auditorium lane wat shaduh State Convention Centre. Hynrei mynta u ong ba ynda la pynkynrïahnoh ïa ka Iing Dorbar Thawain ka Jylla sha New Shillong ki paidbah kin sa ïoh pyndonkam ïa katei ka auditorium kaba ju pynlong dorbar na ka bynta kiba bun ki kam.
“Shen ngan sa thoh sha u Speaker jong ka Iing Dorbar Thawain ka jylla ban pynstet pynkynriah noh ïa ka Iing Dorbar sha ka Iing Dorbar ba thymmai,” u la ong.
Ha kane ka jingjurip la donlang ruh ki ophisar na ki tnad bapher bapher kumjuh ki nongïalam shnong bad ruh ki nongshong shnong na katei ka thain.