Rah ka samla Evashisha Nongtnger ïa ka nam lahduh ha ka jingïakop thei bha briew ha Nongstoiñ

Nongstoiñ, K’lyngkot 25 : Ka rynsan ïakop thei bha briew kaba la pynlong da ka BNARIG Foundation ha ryngkat ka jingïatreilang bad ka Tourism Department jong ka West Khasi hills ha ka janmiet jong ka sngi saitjaiñ ka 24 tarik Kyllalyngkot ka la pynlong ïa ka rynsan ïakop thei bha briew kaba la tip kum ka Miss Sngithiang 2026 ka la long kaba shong shit bad kaba ishong kun bha.
Ka jingpynlong ïa katei ka rynsan ïakop thei bha briew ka long kum shi bynta ban pynshlur ïa ki samla ba kin leit ban ïa shim bynta ha ki rynsan bapher bapher ha kiwei pat ki jaka.Ha katei ka rynsan ïakop ki don khyndai ngut ki samla kynthei kiba la ïa shim bynta. Ha shuwa jong katei ka jingïakop thei bha briew ki la don shibun ki prokram ïapynisap kum ha ki jingrwai bad shad tynrai, ka jingïapyni ïa ki sap ba kyrpang kum ha ka rwai marwei, rwai kynhun bad kiwei kiwei ha kaba baroh ki ba la leit ban ïashim bynta ki la pyni ïala ki sap ba ki don kaba la pynskuiñ bad pynsngewtynnad ïa ki hajar ngut ki paitbah nongwan peit kai.
Ha katei ka rynsan ïakop thei bha briew napdeng ki khyndai ngut ki samla kiba la ïshim bynta ki don tang lai ngut kiba la shah jied kum ki nongjop ha kaba ka samla Evashisha Nongtnger ka la ïoh ban rah ïa ka nam lah duh.
Ïa ka kyrdan ba ar pat la ïoh ban rah da ka samla Ibashisha Thongni bad ïa ka nam balai pat la ïoh ban rah da ka samla Ibanisha Nongrum. Ha katei ka janmiet u bah Methodius Dkhar MLA ka Mawshynrut uba bat ruh kum u Myntri ka tnad Food &Civil supplies & Labour ha ka sorkar jylla u la long kum u kongsan bad u bah Gabriel Wahlang MLA ka Nongstoiñ kum u symbud kongsan.
Shuwa ban sam ïa ki khusnam sha ki nongjop u bah Gabriel Wahlang haba kren kum u symbud kongsan u la ong ba kum kitei ki jait prokram kim dei tang ki tamasa hynrei ki long kum ka lad ban pynshlur ïa ki samla ban ïadon bynta ha kaban kyntiew ïa ka sap ka phong kaba ki don. U la kyntu ruh ïa ki samla ba kim dei ban lehraiñ ha ka ban ïashim bynta ha kino kino ki rynsan hynrei ki dei ban pynlut kai ïa ka por ha kiwei ki kam ki bym ai jingmytnoi hynrei ki dei ban pynlut ïa ka por jong ki ban pyntbit ha kano kano ka sap kaba ki don khnang ba kan long ka jingmyntoi na ka bynta jong ki.
Khatduh eh la ïoh ïa ka jingkren na u bah Methodius Dkhar uba long u kongsan haba ai jingkren ha katei ka sngi u la ong ba u sngew sarong ban ïohi bad ban tip ba ki samla jong ka West Khasi hills ki dei shisha ki samla kiba don ïa ki sap kiba kyrpang ha baroh ki bynta la ka long ha ka rwai ka siaw, ka put ka tem, bad kiwei kiwei. Nalorkata u la ong ruh ba ki samla ka West Khasi hills ki long ruh kiba shlur bad kiba satar haduh katta katta ha man la ki kam kumta ki dei ban pyndon kam hok ïa ki sap ba ki don na ka bynta ban kyntiew ïa district bad ka jylla hi baroh kawei.