Khliehriat, kyllalyngkot 24: Kum shi bynta ka jingrakhe ïa ka 16th National Voters’ Day, ka ophis jong u Deputy Commissioner (Elections), East Jaintia Hills District ha ryngkat ka jingïatreilang bad ka ophis jong ka District Sports Officer, East Jaintia Hills District ha ka sngi Saitjaiñ ka la pynlong ïa ka prokram ba kyrpang ka “National Voters’ Day Run 2026” kaba don ïa ka phang pdeng “My India, My Vote” bad la pynlong ïa ka jingïamareh marathon kaba naduh ka ophis u Deputy Commissioner barim shaduh sha Public Health Centre (PHC) Rymbai bad phai biang sha DC ophis barim.
U Additional Deputy Commissioner, East Jaintia Hills District, u S.R Marak, MCS u la kaweh ïa ka lama ha katei ka sngi ban sdang ïa ka jingmareh kaba 10 Kilomitar ba la ïa don ryngkat lang ruh ka Assistant Commissioner, ka E.A Sangma, MCS, ka Assistant Commissioner, ka E.D Shira, MCS, lem bad ki heh sorkar kiba na ka tnat Sports East Jaintia Hills District.
Ha kane ka jingïamareh la ïohi ïa ka jingwan ïashimbynta shitrhem ki nongshong shnong kynthei bad shynrang kynthup ruh ïa kiba la kham rangbah.
ïa ki nongïashim bynta kiba jop ha kane ka jingïakop mareh marathon ha ki kyrdan bapher bapher la sam khusnam da ka pisa lem bad ki syrnot ha kaba kiba wan kyrdan ba nyngkong ki la khur ïa ka song khusnam kaba T10000/- (shiphew hajar tyngka), kiba wan ba ar ki ïoh ïa khusnam kaba T. 5000/- (san hajar tyngka) bad kiba wan ba lai la ai T 3000/- ( lai hajar tyngka).
Ha ka thup ïakop jong ki shynrang, u Junom Phawa u la wan ha ka kyrdan ba nyngkong, hadien ba u la lah ban pyndep ïa ka jingmareh da kaba shimpor tang 28 minit bad 25 sekon. Nangta ha ka kyrdan ba ar la wan bud da u Rishanmehi Ryngkhlem da kaba shimpor 28 minit bad 26 sekon ban pyndep, katba u Meshantre Ryngkhlem u la wan kyrdan ba lai da kaba pyndep hapoh 30 minit bad 45 sekon ïa ka jingmareh.
Na ka liang ki kynthei ka Dakahi Kyndait ka la wan kyrdan ba nyngkong ha kaba ka la pyndep ïa ka jingmareh hapoh ka 37 minit, ka Nemki Phawa ka la wanbud ha ka kyrdan ba ar da kaba shimpor 40 minit ban pyndep ïa ka jingmareh, bad ka Ibarisha Phawa ka la long ba lai ka la pyndep ïa ka jingmareh hapoh ka 41 minit 17 seconds.
Lah ban ong ruh ba kane ka sngi National Voters’ Day la ju leh man la u snem kum ka jingpynkynmaw ïa baroh ki nobgshongshnong ka ri ba ka dei ban pynkhlain ïa ka jingsynshar paidbah da kaba ïa shimbynta ha ka jingthep vote bad kaba pyni ruh ïa ka bor jong ka vote bad kaba pyni ruh ïa kata ka jingdon ka jingkitkhlieh ban shimbynta ha ka jingthep vote.
