SHILLONG, Kyllalyngkot 25: Ka Shillong Cricket Association (SCA) ha ka 24 tarik Kyllalyngkot (sngi Saitjaiñ) ka la ïoh ban pynhap pyrda noh ïa ka Shillong Cricket League 2nd bad 3rd Division jong u snem 2026, ha kaba ka Cluster CC bad ka Mawsyiem CC ki la pynkut ïa ka samoi kum ki lahduh ha la ki jong ki Division hadien ba ki la jop ïa ka phainal.
Ka Cluster CC ka la rah ïa ka nam lahduh ha ka 2nd Division hadien ba ka la pynliem noh ïa ka Metallica Rising da 8 wiket, katba ka Mawsyiem CC ka la jop ha ka 3rd Division hadien ba ka la jop da 40 ron pyrshah ïa ka Shillong Sixers.
Ka phainal ba nyngkong ka la long ha ka 3rd Division, ha kaba ka Mawsyiem ka la kam trai ban tied nyngkong hadien ba jop ïa ka jingkynting pisa (toss). Ka kynhun ka la lah ban buh ïa ka thong kaba 148/8 haki 20 ober, ha kaba u Devention Lyngdoh (31 ron naki 22 bol) bad u Settle Diengdoh (18 ron naki 24 bol) kidei ki nongïalehkai kiba la lamkhmat ha ka tied.
U Manish Singh (4 ober: ailad 20 ron) bad u Sandeep Roy (4 ober: ailad 25 ron) nongkawang bol jong ka Shillong Sixers, ki la ïoh ban khur mar 3 wiket, hynrei ka kynhun ka la ïohlad ban kamai tang 108 ron, khyllem 8 wiket haduh kaba kut ki 20 ober haba pyrshang beh ïa ka thong.
Kiba la tyngshaiñ ha ka boling na ka bynta ka Mawsyiem ki long u Settle Diengdoh uba la khur 3 wiket naki 4 ober bad ailad 13 ron, kaba pynlong ïa u ban khur ïa ka khusnam Player Of The Match, katba u Wanbiang Nongrum u la khur 2 wiket naki 3 ober bad ailad 13 ron.
Ha ka phainal jong ka 2nd Division, la ïohi ïa ka Metallica Rising kaba la buh ïa ka thong kaba 136 ron bad hap 9 wiket haki 20 ober. Kiba la lamkhmat ha ka tied ki long u Kumar Chettri (38 ron naki 38 bol) bad u Navin Sunar (14 ron naki 11 bol).
Napdeng ki nongkawang bol jong ka Cluster CC, u Azad Qureshi u la khur 3/28 naki 4 ober, katba u Basant Chettri u la khur 2/35 naki 4 ober. Nangta ka kynhun ka la pyndep ïa ka kamram ban poi sha ka jingjop da kaba kamai 139 ron bad hap tang 2 wiket haki 20 ober.
Nalor ba u la weng 2 wiket ha ka boling, u Basant Chettri u la noh synñiang ruh 48 ron ha ka tied na ka bynta ka Cluster CC, kaba pynlong ïa u ban khur ïa ka khusnam Player of The Match, katba u Rahul Paul u la kamai 50 ron naki 38 bol.
Ha kane ka sngi la wan kongsan da u Bah Samborlang Diengdoh-Secretary ka Dorbar Shnong Urkaliar, ryngkat bad u Dhurba Thakuria-Treasurer barim jong ka MCA kum u symbud kongsan ha ka jingïadon lang ki nongïalam bad ki dkhot nongkitkam jong ka Shillong Sports Association (SCA).
