Ïasyllok ka DIPR, UNICEF bad ki lad pathai khubor ban kyntiew ïa ka longbriew manbriew

Shillong, K’ Lyngkot 24: Ka jingïasyllok ki nongshong shnong kaba thmu ban pynkhlaiñ ïa ka kam ki lad pathai khubor ban ïathuh halor ki kam pynroi ka longbriew manbriew ha Meghalaya la pynlong ha ka sngi Thohdieng ha Main Conference Hall, Secretariat, Shillong.
ïa kane ka la pynlong da ka jingïatreilang hapdeng ka tnat Information and Public Relations (DIPR), Meghalaya, bad ka UNICEF.
ïa kane ka jingïasyllok la pynïaid da u Dr. Vijay Kumar Mantri, IAS, Commissioner & Secretary, Information and Public Relations (IPR), ka sorkar jylla.
Ha kane ka jingïalang ki dkhot jong ki lad pathai khubor ki la pynpaw ïa ki jingeh ha ki jingïakhun kiba ïadei ban pynurlong ïa ki lad jingtip, ki jingeh haba ïadei bad ki lad jingpynïasoh, kyrpang ha ka por ba thoh khubor na ki jaka ba sha kyndong bad ki thaiñ nongkyndong. Ki la pan ruh ki lad jingïarap na ka DIPR ha ka por ba la phah ïa ki dkhot sha bar Shillong.
Ba mihkhmat ïa ka UNICEF, Laxminarayan Nanda la banjur halor ka jingkongsan ka lad pynroi kaba long pdeng halor ka longbriew manbriew kaba ïathuh ïa ki jaka jong ki paidbah, khamtam ki khynnah bad ki jaitbynriew kiba tlot.
La kyntu ïa ki nongthoh khubor ban thoh ïa ki khubor kiba longpdeng kiba ïathuh ym tang ïa ki jingeh hynrei ïa ki jingmih kiba bha ruh da kaba kdew ba kum kine kin ïarap ban pynwandur biang ïa ki jingïathuh kiba kyntiew bad ba pynkhlaiñ ka jingshaniah na ki paidbah ha ki lad pathaikhubor.
Ka Nanda ka la pyntip ruh ba ka jingpyrshang kan don ban ïarap ïa ki lad pathai khubor ha baroh ki 12 tylli ki district jong ka state, lyngba ki regional training. Ka jingsdang kan kynthup ban bishar ïa ki media protocol kiba don ba la pynmih da ka Ministry, ki jaka treikam ki lad pathai khubor bad ka state DIPR.
Na ka liang Dr. Madhulika Jonathan, UNICEF Chief Field Officer, ka la pyni ïa ka presentation halor ki kam ka UNICEF ha Meghalaya.
ïa kane ka jingïasyllok la pynkut da ka jingkhot ka jingïatreilang hapdeng ka sorkar, ki lad pathai khubor bad kiwei kiwei ban kyntiew ïa ka jylla bad ki nongshong shnong.