155 ngut ki samla na Meghalaya bad Arunachal kila ïohpdiang ïa ka shithi thung kam na u IG ka BSF

Shillong, K’Lyngkot 24: Ki shipai ïada khappud jong ka ri ki Border Security Force (BSF) kila sam ïa ki shithung kam na ka bynta ki kyrtong kiba la shah jied na ka jylla Meghalaya bad Arunachal Pradesh kiba don haduh 155 ngut.
Ïa kine ki shithi, la sam ha ka por ba pynlong ïa ka Rozgar Mela kaba 18th ha shlem trei kam ki BSF ha Umpling, Shillong.
U Kongsan ha kane ka sngi u dei u Om Prakash Upadhyay, u Inspector General ka BSF Meghalaya, u la ai khublei kyrpang ïa baroh ki kyrtong ba dang shu thung thymmai bad u la khot ïa ka Rozgar Mela kum ka jingthmu ba pawnam jong ka Sorkar India.
Haba ai khublei ïa ki ba shah thung kam shipai, u la ong ba ka bynta jong ki ha ki tnad bapher bapher ki kit ïa ka jingkitkhlieh kaba khraw ha kaba ïada ïa ka ri bad ban kyntiew ïa ka jingkiew jong ka, bad ka jingshakri jong ki kan ai mynsiem ïa ki pateng ban wan ban shakri ïa ka ri.
U Ratan Lal Bagaria, DIG, PSO, ha ka jingkren ka jong u, u la ong ba ba kane ka kane ka jingsam ïa ki shithi thung kam ka long ban pynkynmaw ba ka sorkar pdeng ka shim ïa baroh ki lat ki lynti ban ai kam ai jam ïa ki samla bad kane ka dei ka thong kaba u myntri rangbah duh jong ka ri u Narendra Modi u don ïa kane la sdang ha u snem 2022.
Na kine ki 155 ngut kiba la ioh ïa ka shithi thung kam mynta ka sngi, 76 ngut ha ka kynhun shipai BSF, 42 ngut ha ka kynhun pulit CRPF, 20 ngut ha ka kynhun shipai ITBP, 11 ha ka kynhun shipai Assam Riffle.
U myntri rangbah duh jong ka Ri India u la ong ba mynta ka sngi la sam ïa ki shihti thung kam sha ki 61000 ngut ki samla kynthei bad shynrang jong ka ri hi baroh kawei.