Ba leh thok ka NESS ïa ka Trading License yn pynduh syndon ka KHADC
Ai jingthoh sha ka NIT Sohra ban pynduhkam Security
Shillong, Kyllalyngkot 24 : Ka Khasi Hills Autonomous District Council (KHADC) ka la rai ban pynduh Trading License noh ïa ka North East Security Service (NESS) kaba dei na Assam hadien ba la lap ba ka pyndonkam bakla ïa ka Trading License ba la ai ba kin thep kam ha Kendra Vidyalaya , Laitkor bad da kane ka juh ka License la pyndonkam ban thep ïa ka kam security ne bor pahara ha NIT Sohra ruh.
U CEM ka KHADC u bah Winston Tony Lyngdoh u la ïathuh ba ka KHADC ka la thoh sha u Director ka NIT Sohra ban pynduh ïa ka kam Security ba la ai sha ka NESS. Nalor kata ka KHADC ka la rai ban pyndam noh wat ïa ka Trading License ba la ai ba kin thep kam ha KV Laitkor.
ïa kane la leh namar ka NESS ka la pyndonkam bakla ïa ka Trading License bad kumta kum ka jingleh beaiñ bad pynkheiñ aiñ jong katei ka kompani ka KHADC ruh kan leh da kaba tyngeh. Namar ym lah ban pyndonkam da kajuh ka Trading License na ka bynta ar tylli ki kam ne projek . Namar kawei ka Trading License ka dei ïa kawei ka kam ne ka projek.
“ Kawei ka Trading License ïa kawei ka projek ne ka kam hynrei ka NESS kam shym la bud ïa kane ka kyndon” ong u CEM.
ïa kane la lap hadien ba ka HNYF ka la bud dien haba ka la ïoh ka jingujor na ki nongpahara ha ka NIT Sohra namar la kynnoh ba kane ka NESS ka dawa bai registration ha ka dor kaba heh bha na kiba kwah ban ïoh kam lyngba jongka.
Ka KHADC ka la rai ruh ba kan ym ai Trading License shuh sha ka NESS ha ki por ki ban sa wan ruh.