Pynïar ka IIPH ïa ka shnat trei kam sa sha Tura ban kyntiew ïa ka jingwad bniah halor ka koit ka khiah

By Mawphor Editor On Jan 25, 2026

Shillong, K’Lyngkot 24: Ka Indian Institute of Public Health (IIPH), Shillong ka la plie paidbah ïa ka Regional Office ha Tura, West Garo Hills ban pynkhlaiñ ïa ka jingwad bniah ïa ka koit ka khiah ki paidbah, ban kyntiew ïa ka bor, bad ka jingkyrshan ban pyntreikam ha ka thaiñ Garo Hills.
Ka jingplie paidbah kaba ïahap bad ka jingrakhe ïa ka Meghalaya Day, ka la pynpaw ïa ka jingangnud jong ka jaka pule ban ïatreilang ha ka koit ka khiah paidbah kaba ïadei bad ka thaiñ.Ka ophis thymmai ka thmu ban ïatreilang bad ki bor synshar district, ki nongtrei ka koit ka khiah kiba hakhmat eh, bad ki nongshong shnong.
Ha kane ka sngi ba plie la wan ïashim bynta da ki heh ophisar jong ka district, ki ophisar ka koit ka khiah, bad ki nongtrei ka koit ka khiah paidbah, kaba pyni ïa ka jingïatylli lang ban kyntiew ïa ka jingthmu jong ka koit ka khiah kaba pynshong nongrim ha ka jingai jingshakri ha ka thaiñ.
Haba kren ha kane ka jingïalang, ka Prof Sandra Albert, Director, IIPH Shillong u la ong, “Ka Tura Regional Office kan long kum ka jaka ba la pynïaid da ki bor sorkar ban kyrshan ïa ki tnad ka koit ka khiah jong ki distrik, ban pynkhlain ïa ka jingïadei bad ki paidbah, bad ban pynkylla ïa ki jingwad bniah sha ki kam,” ka la ong.
Ka regional office ba thymmai la khmih lynti ba kan kyrshan ïa ki jingthmu ban pynkhlain ïa ki tnad ka koit ka khiah, ban kyntiew ia ka jingpyrkhat halor ka koit ka khiah jong ki kmie bad ki khunlung, ban tei ïa ka bor hapdeng ki nongtrei ka koit ka khiah kiba hakhmat eh bad ban don ia ka jingiatreilang bad ki kynhun ka koit ka khiah jong ki district bad ka bor synshar jong ka West Garo Hills.
Ha kane ka sngi ka Mary Liza K Marak, Additional Deputy Commissioner, West Garo Hills, ka la wan ban shim ïa ka bynta kum ka kongsan bad kala ai jingïaroh ïa kane ka IIPH bad ïa ka jingstad ha ka koit ka khiah ki paidbah.
Ka IIPH Shillong, ha kine ki snem, ka la iatreilang bad ka Sorkar Meghalaya bad ki bor synshar district halor ki jingthmu ba bun jait jong ka koit ka khiah paidbah ha kylleng ka jylla.Ka jingseng ïa ka ophis ha Tura ka pynskhem ïa ka bynta kaba nangroi jong ka kum ka jingtip ba kongsan jong ka koit ka khiah bad ka paralok ban pyntreikam ha ka thain shatei lammihngi jong ka Ri India.