Nongpoh, K’Lyngkot 24: Shi bynta ban kyntiew bad pyniar ïaka jingpynmih ïa u ksai Muga, ka Central Silk Board, Ministry of Textiles jong ka sorkar India, kala pynlonng ïaka prokram ai jinghikai kaba 3 sngi lynter naduh ka 19 haduh ka 23 tarik mynta u bnai bad kumba 25 ngut ki nongri khñiang kila ioh jingmyntoi bad wan shim bynta ha kane ka prokram na kylleng ka Ri-Bhoi District bala pynlong ha Muga Eri Silkworm Seed Organization (MESSO), P-3 Unit, Nongpoh, Meghalaya.
ka jingangnud jong ka CSB ban pynlong ïa kane ka prokram ka long ban pynkhlaiñ ïaka jingpynmih ïa u ksai muka katkum ka juk stad ba mynta lyngba ki jinghikai da ki riewstad naduh ka jingpynmih symbai, ka jingïada na ki jingpang bad ki khñiang bad kiwei kiwei.
Lyngba kane ka prokram, naka liang ka kong RB Lyngwa ka ba dei ka District Sericulture Officer ka Ri-Bhoi District lem bad kiwei kiwei ki ophisar naka tnad Sericulture bad Central Silk Board kila ioh ruh ban batai shai sha ki nongri khñiang halor ki skhim bapher bapher ba ki lah ban pyniar ïaka rukom ri khñiang khamtam ban kyntiew ïaka ioh ka kot ki nongrep lyngba ki rukom rep bad rukom ri katkum ki juk stad ba mynta ryngkat ka jingpynlait ïaki kot ba pher bapher kiba hikai ïaka rukom ri, ka rukom ïada bad ka jingpynmih ïa u ksai muka.
Naka liang ki ophisar ha kane ka sngi kila pyynshlur ruh ïaki nongrep bad ki nongri khñiang ba kin shim ïaka sienjam ban pyndonkam da ki juk stad ba mynta lada ki kwah ba ka rukom rep bad ri ïa u khñiang muga kan kyntiew arshah ïa kaba ki ju ri baroh shi katta bad kane hi kan kyntiew ïaka rukom pynmih ïa u ksai muga bad ruh ka ioh ka kot haka juh ka por.
Ha katei ka sngi la sam ruh ïaki syrnod sha ki nongri bad nongrep kum ka jingai mynsiem ïaki ban dang pynjanai shuh shuh ïaka jingpynmih ïa u ksai muga ha Ri-Bhoi District.
