Bym shimkhia ka sorkar ban theh kam pynroi sepei ki spah mariang ha khappud ka West Khasi Hills District : Bah H. Sangleiñ

Nongstoiñ, Kyllalyngkot 21 : Ka jingdon jong ki jaka jngohkai kiba itynnad ha ki shnong khappud jong ka West Khasi Hills, District kum ka kshaid thwei lyer kaba hap hapoh u pud u sam jong ka shnong Dronpara kaba jngai kumba lai kilomitar na Langpih, ka kshaid Chongadare ha ka shnong Huwapara ha Malangkona, ka Mawpasam ha Nongmawleiñ bad bun kiwei kiwei ki jaka ba don nam kiba dei ka spah bah kiba ka mei mariang ka la thaw hi bad kiba long ruh ka thymmei jong ka ïoh ka kot na ka bynta ki paitbah nong shong shnong ki shu sepei tang na ka daw ba ka sorkar kam shimkhia ban phaikhmat bad ban theh ïa ki kam pynroi.
Ha kaba ïadei bad ka jingdon jong ka kshaid thwei lyer kaba jngai kumba lai kilomitar na ka surok Langpih sha Kamphaduli u nongthohkhubor hadien ba la ïoh jingtip mynta ka sngi balang ka 21 tarik Kyllalyngkot u la hiar sha katei ka jaka ryngkat bad ki paralok ban leit jngoh ïakatei ka kshaid. Ban poi sha katei ka kshaid la hap ban ïaid lyngba ka surok ba ka dorbar shnong Dronpara ka la pyntrei lyngba ka skhim MNREGS hynrei na ka daw bym don ka jingkieng, la hap ban kam na sha shiliang sha shiliang da ka ïaid na ka wah kaba don katei ka kshaid da ka kjat bad ki kali rit ruh kim lah satia ban kam namar ka jingkhohruh khohram lait noh ki Mahindra pickup. Ha kane ka jaka don byllai ki bri kwai, ki jaka rep synsar bad ki khlaw siej ba rben ka la long shisha kaba long kaba sngewtynnad eh haduh katta katta.
Haba la poi hajan katei ka kshaid la lap ba ka don kawei ka ïing ba la shna khnang na ka bynta ba kiba wan jngohkai bad kiba wan shangkai suwari ïa kaba la shna da ka dorbar shnong Dronpara, ka dei ka ïing kaba shu tap da ki tin khlem don jingker satia. Nalorkata lalap ba harud jong katei ka kshaid ka dap da ki khlaw kiba rben kiba don ha shilynter jong katei ka kshiad bad ka long shisha kaba itynnad shikatdei eh.
Na ka liang jong u bah H.Sangleiñ, u rangbah uba la ïalam lynti haduh katei ka kshaid u la ïathuh ba ha manla usnem ynda la poi u bnai Nohprah haduh ka taïew ba nyngkong jong u bnai Kyllalyngkot da ki spah ngut ki nongwan jngohkai na ka jylla Assam kiba wantuid manla ka sngi sha kane ka jaka ba don ka kshiad da ki kali ar shaka bad da ki kali saw shaka, hynrei ki hap ban sangeh noh ha kawei ka madan kaba don hapoh ka shnong bad ki ïaid da ka kjat ban poi sha katei ka kshiad.
U bah Sangleiñ la ïathuh ruh ba ka na ka liang ka sorkar jong ka jylla Assam la bun phewsien ka la phah ïa ki briew jong ka ban sorbe ïa ka surok ban pynpoi haduh katei ka kshaid hynrei ki paitbah jong kane ka shnong Dronpara kim shym la ailad satia bad ki beh thong ïa kine ki briew ba phah ka sorkar Assam bad kat haduh mynta mynne ym don shuh kiba wan mushlia.
Nalorkata kumba shiteng kilomitar ei ei shuwa ban poi sha katei ka kshaid sha shiliang jong ka wah ka la don ka jaka kaba madan bha kaba itynnad bha bad la lap ruh ba ka don kawei ka ïing kaba itynnad bha kaba la sop da phlang bad kaba la pynlong kum ka dukan sha na ka bynta ki ba wan jngohkai ïa katei ka kshaid. Don ruh haduh khatwei tylli ki ïingrit kiba sop da u phlang kiba la pynshna khnang na ka bynta ki nongjngohkai pyrthei ban sahmiet hynrei ki la jot noh.
Kumta lada ka sorkar ka kwah ban kyntiew ïa ki kam jngohkai ka la dei ban phaikhmat kyrpang sha katei ka jaka da ka shna lem ka surok kaba bha bad ki jingkieng khnang ba kan long ka jingkyrkhu ïa ki paitbah nongshong shnong jong kane thaiñ la pynkut u bah Sangleiñ.