Ki Sahep sorkar ki dei ban kitkhlieh bad ai ïa ka jingshakri kaba bha tam : A.Nongbri

Nongstoiñ, K’lyngkot 21: Ka Ophis treikam jong ka Deputy Commissioner Eastern West khasi Hills District mynta ka sngi kum ka dak jong ka jingrakhe ïa ka jingdap 54 snem jong ka jingïoh ïa ka jylla ba pura, ka la pynlong ïa ka program ha Multipurpose hall jong ka DC Ophis ha Mawsawa Eastern West khasi Hills District.
Ha kane ka sngi la sakhi ïa ka jingwan ban ïadonlang naduh u Syiem ka Hima Nongkhlaw u Paiem P.M Syiemlieh, u Myntri ka hima Nongkhlaw u Dr Boldness Nongum u ba long ruh u Principal ka Khatsaw-phra College, u ADC u bah A Nongbri, u SP u Bah D. Khyriem, Bah M. Diengdoh MCS, ADCs, Bah L.Myrthong AEC, ki Ophisar Sorkar, ki nongtrei kam sorkar na ki tnad treikam hapoh ka District ki Sordar shnong lem bad ki paidbah nongshong shnong.
Ha ka jingkren u bah A.Nongbri u ba long u Kongsan ha kane ka sngi u la kren pynpaw bad phai dien ïa ka jingshah shitom ki nongïalam jong ka jylla ban ïakhih na ka bynta ban ïoh ïa la ka jong ka jylla.
U la ong ba ka Jylla ka pyndep ïa ka jingïaid lynti ha ki 54 tylli ki snem ha ryngkat ki kam pynroi, hynrei u la ong ba ka dang dei ïa ka jylla ban dang kiew shuh ha kiba bun ki liang.
U la kyntu ba kum ki Ophisar sorkar na ki tnad sorkar bapher bapher kin hap ban ai kaba bha tam ka jingshakri ha ka kam na ka bynta ki paidbah bad ka Jylla. Kane ka sngi ka pynkynmaw ba ym dei ban trei tang ban ïoh ïa ka tulop, hynrei ka pynkynmaw ba dei ban don ka jingkitkhlieh ban kyntiew ïa ka ri bad ka jaidbynriew bad ban ïa ryngkat bor bad kiwei ki Jylla.
Kiwei kiba la kren ha kane ka jingïalang ki kynthup ïa u Paiem PM Syiemlieh Syiem ka hima Nongkhlaw, u Myntri ka hima Nongkhlaw, u Dr Boldness Nongum. Shuh shuh la sam ruh ïa ki khusnam ïa ki lai ngut, kum ka dak ka jingburom ïa ka jingnoh synñiang jong ki ïa ka district.