Nongstoiñ, K’ Lyngkot 21: Ka jingdon jong ka Nongstoiñ civil hospital kaba shispah jingthiah ka la long ka jingkyrkhu kaba khraw ïa ki paidbah ka West Khasi Hills kata naduh kiba pang ba shitom haduh ki longkmie kiba armet kiba donkam ban leit kha ha katei ka jaka sumar. Kum ban pynkynmaw ba naduh ba katei ka hospital ka la kynjoh khatsan snem kynthih naduh ba la plie ïa ka hynrei haduh mynta ka jingdon ki jaka thiah pang ki dang neh kumjuh kumba ka long naduh ba sdang.
Ha ka jingleit jngoh jong u nongthoh khubor ïa katei ka jaka sumar ha ka lah sngi u Blei jong kane ka taïew la ïoh ban ïakren sani bha bad u Dr Z. Marak Medical Superintendent ha kaba ïadei bad katei ka hospital ha kaba u Dr Marak u la ong ba kumba ka long mynta ka jingtrei kam ha katei ka jaka sumar ka la biang lut hynrei ka dang donkam shuh shuh ban don kham bun ki nongtrei khnang ba ka jingtreikam bad ka rukom sumar ïa ki nongpang kan kham sted bad kham janai.
U la ong ruh ba na ka liang ki doctor kiba sumar ïa ki nongpang ki la don lut hynrei ka jingdon jong ki mashin ban test ïa ki jait jingpang kam pat da biang pura kumba ka long ha ki jaka sumar kiba kham heh kum ha Shillong.
Ha kaba ïadei bad katei ka jaka sumar u Dr Marak u la ong ba katkum ka jingïaid ka por ka la idon kam eh ban don noh da ka building kaba kham heh bad kaba kham biang ban kham pynbun shuh shuh ïa ki jingthiah jong ki nongpang. U la ong ruh ba haba peit bniah ïa katei ka building kaba mynta lada pynkiew biang shajrong ruh imat kam long shuh bad lada pynheh shuh shuh ruh ka jaka ka la khim palat namar ka long kaba ïabun bha ki nongpang.
Nalor kata u la ong ruh ba katkum ka jingïaid ka por bad ka jingkiew sted ha ka jingbun briew ha ka por ba bun palat ki nongpang ki jingthiah kim dap shuh bad ki nongpang ki hap ban thiah ha madan ruh. U la ong ba hapoh ka district ki la don kumba san tylli ki Primary Health Centre hynrei artylli na ki, ki dei kiba ka sorkar ka la aiti ha ki NGO ba kin pynïaid bad lai tylli pat ki dei ki PHC ba ka sorkar ka pynïaid hi.
U la ong ruh ba kitei baroh san tylli ki jaka sumar ki hap hapoh ka jingpeit jong ka Nongstoiñ Civil Hospital ryngkat ka District Medical & Health Officer jong ka West Khasi hills bad ha kitei ki PHC ki don la ki jong ki jong ki doctor, ki Nurse bad ki nongtrei. Haba kylli pat ba katkum ka jingpynbna jong ka sorkar ha kine ki taïew ba la dep ka long ba na ka bynta ka jingsumar ïa ki longkmie kiba armet yn pyntreikam noh ha ka Maternal & Child Hospital kaba don ha Upper New Nongstoiñ wat la ym shym pat la plie ruh. U Dr Marak u la ong ba ka jingsumar ha katei ka MCH ka dei tang na ka bynta ka OPD hynrei haba ki shitom pat ki hap ban thiah ha Civil Hospital.
Haba kylli pat la ka sorkar ka la dep thung lut ne em ïa ki nongtrei ha MCH Hospital u la ong ba haduh mynta ka sorkar kam shym pat la thung nongtrei satia bad lehse ha kine ki sngi ban wan kan sa pynmih ïa ki Advertisement bad pynbna ïa ki post kiba lait ha katei ka MCH Hospital.
