Nongstoiñ, K’lyngkot 21: U Superintendent of Police West Khasi Hills District Bah H.Kharkongor MPS, u la pyntip ba ha ka 2 tarik u Risaw 2024, la ïoh pdiang ïa ka FIR na kawei ka nongujor kaba pyntip ba ka khun kynthei ba dang 17 snem ka rta jong ka la shah leh beijot ha u Skaidinglan Nongphud.
Hadien kane, la register ïa ka case pyrshah ïa u nongshah kynnoh ha Nongstoiñ Police Station Case No. 20(10)2024 hapoh ki Section 5(n)/6 jong ka POCSO Act. La shimti ïa ka jingtohkit hapoh ka jingtohkit u UBSI Besstar Diengdoh jong ka Nongstoiñ Police Station bad hadien ba la pyndep ïa ka jingtohkit, la pynmih ïa ka charge-sheet hapoh ki Section 5(n)/6 jong ka POCSO Act.
Hadien kata, ha ka 27 tarik u Naiwieng 2025, ka Hon’ble Court jong u Special Judge (POCSO) Nongstoiñ, hadien ba la bishar bniah ïa baroh ki sakhi bad ki sabut ba la wanrah ha ka por jingtohkit, ka la pynrem ïa u nongshah kynnoh Shri Skaidinglan Nongphud.
Ka Ïingbishar ka la pynshitom ïa u ban shah set along haduh 20 snem (Rigorous Imprisonment) ryngkat bad ka kuna ba ?50,000/- na ka bynta ka kam bymman kaba hap hapoh Section 6 jong ka POCSO Act.
Lada um siew ïa ka kuna, u nongshah pynrem un hap ban shah set shuh shuh ha ka jingshah set suk (Simple Imprisonment) na ka bynta hynriew bnai namar ka kam bymman pyrshah ïa katei ka khynnah kynthei.
