Ban pynlait luid ïa ki nong Tibet da ki hajar kilo metre ñiah cycle u Sandesh Meshram

Shillong K’ Lyngkot 20: Kum shi bynta ban ïai ïalap ïa ka jingdonkam ka jinglait luid bad ban kren na ka bynta ki nong Tibet u Sandesh Meshram, Regional Convenor, Western Region-1 (Maharashtra bad Goa), ka core group na ka bynta ka dawbah ki nong Tibet ha India, u la pynlong da ka jingïalap da kaba ñiah cycle haduh 6 tylli ki Janjagaran Yatra kiba la sdang na Arunachal Predesh.
Ha kaba ïadei bad kane, haba ïathuh shaphang kane, sha ki lad pathai khubor u Meshram u ong ba u la sdang ïa kane ka jingñiah cycle ha Bumla khappud ka Tibet ha Arunachal Pradesh ha ka 9 tarik Nohprah, 2025 bad un pynkut pat ha Shillong ha ka 9 tarik Rymphang, 2026 ha kaba kane ka jingïaid lynti jong u da ka cycle ka long malu mala 2604 kilo metre kiba kynthup ïa ki 3 jylla ka Arunachal Pradesh, Assam bad Meghalaya bad kane ka dei lang ruh bad ka jingrakhe ïa ka snem jong ka kam jingleh isynei jong u.
U la ïathuh ba ka kynhun ki nong Tibet ha India ki la ïai pyrta ban pynlait luid ïa ka Tibet bad ban ïada ruh ïa ka India.
U la ong ruh ba ha ki 5 tylli ki Janjagaran Cycle Yatra kaba u la pyndep mynshwa, u la ñiah ïa ka Cycle haduh 18 hajar kilo metre da kaba ïaid haduh 10 tylli ki jylla, ba kynthup ïa ka jylla Himachal Pradesh, Madhya Pradesh, Chhattisgarh, Odisha, Andhra Pradesh, Uttar Pradesh, Bishar, Sikkim, Karnataka, West Bengal, Tamil Nadu, Puducherry bad Kerela ha ki snem 2014, 2016, 2017, 2020 bad ha u 2021 bad ka Yatra kaba 4 u la pyndep ha ki ar bynta, da kaba ong ba kane ka jingleh jong u ka long ka jingpynsngewthuh sha ki nong India ïa kaei kaba jia ha khappud ka Tibet bad na ka bynta ka suk ka saiñ ha kine ki jaka.