La slem palat ban pyndep ïa ka surok Rilbong – Upper Shillong, kynthoh u nongïalam Congress

Shillong, K’Lyngkot 19 : Ka la mih ka jingkynthoh na ki paidbah halor ka jingslem ban pyndep pura ïa ka surok fourlane naduh Rilbong – Umshyrpi ter ter haduh Upper Shillong da kaba ong ba kane ka la ktah haduh katta katta ïa ka leit ka wan jong ki paidbah.
“Kaei kaba la kular ka la kylla long pynban ka jingeh kaba la slem bha na ka bynta ki paidbah. Wat la shna da ki snem bad la pynbna bunsien da u Symbud Myntri Rangbah ba peit ïa ka tnad PWD, Bah Prestone Tynsong, hynrei ka surok ka dang sah khongreng bad kam pat long kaba shngain haduh mynta,” ong u Bah Lionel Nongkhlaw uba dei u Nongïalam ka Mylliem Block Congress Committee ha ka kyrwoh sha ki lad pathai khubor.
Shuh shuh u la kynnoh ruh ba ka jingpynkhyllem ïa ki lum, ka jingsaphriang ka khyndew hapdeng surok, ka jing bymbiang ki jingkdew lynti naei ban ïaid ki kali, naei ban ïaid kjat, la ailad ïa ki jingeh, ïa ki jingma bad ki jingbym shngaiñ jong ki paidbah ban bteng khlem da don kano kano ka jingkitkhlieh. La kynnoh ruh ba man la ka sngi ki nongleit nongwan ki mad jingeh lyngba ka jingkhapngiah kali kaba long baroh shisngi, ki jingpynkylla lynti kynsan kynsan bad ka jingkhang ïa ki lynti ïaid kaba la wanrah ïa ki jing aksiden kaba khah khah.
“Ki nongñiah kali ar shaka ki mad ïa ka jing ring mynsiem da u pum pum ha ka por ba rang, kaba la ktah ïa ka koit ka khiah bad ka jingktieh da ka jinglait ki pipe PHE kaba la wanrah ka jingmynsaw da ka jing btuit ha ka khyndew ktieh. Katba ki kali kit Nongpang, ki kali kit khynnah skul bad ki kali kit paidbah ki sahkut ha ka jingkhapngiah bad dheng kali kaba neh bun bun kynta ha kaba la don ba ki nongpang ki ba la mad jingjia ba sngewsih ha shiteng lynti bad ki khynnah skul kim lah shuh ban poi ha ka por ba biang,” u la ong.
Shuh shuh u kynnoh ba ka jingbym leh eiei jong ka sorkar wat hapdeng kine ki jingeh, jingma ka long kaba sngewkhia shibun. “Ki dukan kiba ju don ha shi lynter lynti, bun ki la khang noh bad duh kamai namar bym don shuh nongthied nongpet, ki iing ki sem ki tap da u pum pum kaba la ktah ïa ka koit ka khiah, Wat hapdeng ki jingujor bunsien, ka Sorkar kam shym la lah ban ai jingïarap ne ki lad jingïada kiba biang. Ha ki bnai ban wan, ban sa sdang biang, ka jingplie ïa ki skul bad ki kolej, la ïohi ba ka jinglong jingman kan nang sniew shuh shuh. Ka jingbun jong ki kali ba kit khynnah skul ka lah ban pynthut pura ïa ka lynti ïaid. Ka jingbym don ki jaka ïaid kjat, ki dak pynithuh kiba biang, ki lad jingïada hajan ki jaka pule ka buh ïa ki samla pule ha ka jingma kaba khraw.”
Na ka liang une u nongïalam ka Congress u la buh jingkylli mano ban kitkhlieh na ka bynta ka por la buh ban pyndep hynrei ka khlem lah pat ban urlong. “Balei ki kontraktor kim shym la shah pynshitom ïa ka jingpynslem jongki? Bad balei ka Sorkar ba la ïalam da ka NPP kam shym la leh eiei wat hapdeng ki sakhi kiba shai ba ka jingpyntrei ka la long kaba torti bad leh bakla ha ki ba bun bynta kaba hap ban pynpra bad shna arsien?”
Shuh shuh u ong ruh ba ki paidbah ka Mylliem constituency bad ka jylla hi baroh kawei ki la ngiah shoiñ tang ban ai daw da kaba ong ba ki jngkular ki dei kiba shu heh tang ka tyngam hynrei kim lah ban pyndep.
Une u nongïalam ka Congress na Mylliem u la ong ba ka sorkar jylla ba ïalam da ka NPP ka dei ban ai ka jubab kaba shai sha ki paidbah ïa ka por ban pyndep ïa kane ka surok katkum ka jingïaid ka kam ym ban shu pynbna tangba ïohi ha ki report ba phah ki kontraktor. La dawa ruh ba ïa ka kaiphod treikam dei ban pynbna man ka taiew haduh katno ka kam ka la iaid.
Nangta la dawa ruh ba dei ban don da ka komiti kaba laitluid kaba kynthup ïa ki engineer, ki riew shemphang ha ka liang ka leit ka wan bad ki nongmihkhmat jong ki sengbhalang ban buddien ïa ka jingïaid shaphrang bad ban ai jingtip paidbah ïa ki jingshem jongki halor jong ka jingpyntrei.
La dawa ruh ban pyntikna mardor ïa ki lad jingïada, ban jingpynbeit ryntih ïa ki jaka ba don jingma, shna ïa ki lynti ïaid kjat ba la pynkhreh kyrpang, khamtam hajan ki skul bad ki kolej bad ka jingbuh ïa ki nongpeit kali ha ki por wan skul bad wai skul.
Shuh shuh la kyrpad ruh ban pyntreikam ïa ka plan pynïaid kali ba shipor ban pynduna ïa ka jingkhapngiah bad pyntikna ïa ka jingleit jingwan laitluid jong ki kali ba kyrkieh. “Ai ïa ki lad jingïada da kaba synreit um mardor ha ki jaka ba pum pum khnang ban ïada ïa ka koit ka khiah jong ki paidbah,” u la ong ha ka kyrwoh.