Shillong, Naitung, 09: Palat 50 ngut ki shipai BSF ki la ai ei ïa la ka jong ka snam ha ka jingaisnam ei ba la pynlong da ka NEIGRIHMS Hospital bad ki shipai BSF ha ka sngi Thohdieng da kaba ïatreilang bad ka Meghalaya Aids Control Society lem bad ka Meghalaya State Blood Transfusion Council.
Ïa kane ka jingai snam ei ba la pynlong ha ktem sah ki shipai BSF ha Mawpat la plie paidbah da u Chief Medical Officer (SG) jong ka Sector Hospital BSF u Dr. Rachhpal Singh ryngkat ka jingsakhi lang jong ki Commandant ka kynhun shipai BSF 193 Bn bad 110 Bn.
Haba kren ha ka jingïalang, u CMO u la ïaroh ïa ka Department of Blood Bank, NEIGRIHMS bad ïa kiwei kiwei ki kynhun kiba la trei shitom ha kaba pynlong ïa kane ka jingai snam ei.
U CMO u la banjur ïa ka jingdonkam ban ai ei ïa la ka snam bad ong ba ka shi Unit ka snam kan ïada ïa ka jingim bakordor jong kito ki mynsiem briew kiba donkam kyrkieh ïa ki lad jingïarap.
U la ïaroh ruh ïa ki Volunteers kiba la wan shakhmat ban ai ei ïa la ka snam bad ong ba ki shipai BSF ki long kiba kloi ban shakri ïa ki parabriew nalor kaba ïada ïa u pud u sam jong ka ri.
