SHILLONG, Kyllalyngkot 19: Ka Sanmer bad ka Metallica CC ki la jop ïa la ki jong ki jingïalehkai ha ka lympung Cricket League 2nd Division 2026 jong ka Shillong Cricket Association kiba la long hynne ka sngi Nyngkong.
Ka Sanmer ka la pynliem noh da 7 wiket ïa ka Masonic, katba ka Metallica CC ka la jop da 97 ron ïa ka Jersey Kings.
Haba phai sha ki jingïalehkai, ka Masonic ka la buh ïa ka thong kaba 140/9 haki 20 ober, bad kiba la lamkhmat ha ka tied ki long u Sanjay Biswas (26 ron naki 22 bol) bad u Amarnath Sharma (24 ron naki 18 bol).
Napdeng ki nongkawang bol jong ka Sanmer, u John D bad u Pynshngain Dkhar ki la ïoh ban khur mar 2 wiket. Nangta ka kynhun ki nongtied ki la pyndep ïa ka kamram ban kamai 143 da kaba hap tang 3 ngut ban pynsah sa 7 wiket ha kti haki 12.1 ober.
U Marken B u la long uba kongsan tam ha ka tied da kaba kamai 62 ron naki 30 bol kaba la pynlong ruh ïa u ban khur ïa ka khusnam Player of the Match, katba u Damanbha Roini u la kamai 20 ron naki 13 bol.
Ha kawei pat ka jingïakhun, ka Metallica CC ka la buh ïa ka thong kaba skhem pyrshah ïa ka Jersey Kings, da kaba kamai 256 ron haki 20 ober, bad hap 8 wiket. U Binay Ray (58 ron naki 28 bol) bad u Bishal Chettri (54 ron naki 33 bol) ki la lah ban kynjoh ïa ka 50 tam ha ka tied.
Watla u Vivek Sunar bad u Sunil Gurung, nongkawang bol ka Jersey King, ki la lehkai bha da kaba khur mar 3 wiket, hynrei ka kynhun ka la ïohlad ban kamai tang 159 ron namar la lap ba kut ki 20 ober. Lah ban kdew ruh ba ka spah ron jong u Raj Biswas (103 ron naki 62 bol) ka la long leh nohei namar ba ka kynhun ka la rem noh da 97 ron.
Ha kawei pat ka liang, u Bishal Chettri jong ka Metallica, uba la kamai 54 ron ha ka tied, u la ïoh ban weng haduh 3 wiket naki 4 ober, kaba la pynlong ïa u ban khur ïa ka khusnam Player Of The Match. Uwei pat u nongkawang bol ba kham seisoh, udei u Yogendra Singh (2/19 naki 3 ober).
