Shim ka sorkar `200 klur tam na ka NEFR ban ai daw siew bai lutksan jaka halor ka lynti Rel: Saleng

Shillong, K’ Lyngkot 18: U MP ka Lok Sabha na Tura uba dei u dkhot jong ka North Eastern Frontier Railways u Saleng A Sangma u la ong ba ka sorkar jylla ka la shim ka jingbei pisa kaba la long kumba T. 200 klur tam na ka bynta ban shna ïa ka lynti rel ha ka jylla.
“Lah ban long na ka daw jong ka T. 200 klur tam ba ka sorkar jylla ka pyrshang ban ïakren bad ki nongshong shnong ba kin ai ïa ki jaka jong ki,” kynnoh u Sangma.
U MP u la ong ba ka sorkar ka la shim ïa katei ka pisa halor ka jingaidaw ba kan siew ïa ka bai lutksan jaka sha ki nongshong shnong.
U la ong ba bun na ki nongshong shnong khamtam kiba ha rilum Khasi-Jaiñtia kim kwah ïa ka lynti rel na ka daw ka jingtieng ïa ka jingwan tur kyrthlep ki mynder ri bad ki poi wir.
Haba ong ba kane ka jingtieng kadei kaba shisha, u Sangma u la ong ba kane ka dei kaba la pynkyndit bynriew naba kim don ki rukom treikam ba ai jingshngaiñ ha ki railway station.
U MP ka Tura u la ong ba ha ka jingïalang kaba dangshen, u la kdew sha ki ophisar jong ka NEFR, bad ong ba ki dang don bun ki kam ba hap ban pynbeit.
“Kam don kano kano ka jingtalasi kaba biang, kam don ka rukom treikam ba ai jingshngaiñ ban peit mano ba rung hapoh ka rel. Kumta ki briew jong ngi ki hap ban khuslai,” ong u Sangma.
U la kdew ruh ba ki nongshong shnong jong ka jylla ki kwah ïa ki kam pynroi hynrei haba leh ïa kane lada ki trai ri trai muluk kim ïoh ïa ki lad jingmyntoi kaei ka jingmut ban pynïaid shakhmat ïa ka kam.
U Sangma u la ong ba lada ka jylla Meghalaya ka la bun da ki bar jylla kaei ka jingmut jong ka jingdonkam ka kam pynroi.