Bun jait ki tiar ba thaiñ da u siej nga nang hynrei ngam ju die ha ïew ha hat

Nongstoiñ, K’Lyngkot 18: Ki tiar ki tar ba la thaiñ bad shna na u siej bad u thri kum ki shylliah, ki khoh, ki knup , ki trap, bad kiwei kiwei ba ki tymmen naduh mynshuwa ki ju shna bad thaiñ hynrei ha kine ki sngi la ñiar eh ba ki nongshong shnong kin dang ïabeh ban shna ban thaiñ.
Ki dang don sa tang katto katne ki riew tymmen kiba shong ha ki nongkyndong kiba dang minot ban thaiñ jingthaiñ da ki siej bad ki thri. Ha ki khyndait taïew ba la dep la ïoh ban ïakynduh bad uwei u riew tymmen ha ka shnong Riangpoit uba don ïa ka sap ba kyrpang ban thaiñ jingthaiñ da ki siej bad la ïoh ruh ban ïakren bad u ha kaba u la ong ba naduh ba u dang samla u la nang ban thaiñ shylliah, ki khoh, ki prah, ki shang bad kiwei kiwei hynrei um ju die pat ha ïew ha hat.
U la ong ruh ba ka jingbym kwah jong u ban pynïaid ïew ïa ki tiar kiba u ju thaiñ ka dei namar ba u trei ïa kiwei ruh ki kam khamatam ha ka rep ka riang, thung diengsoh bad kiwei kiwei.
Nalor kata u la ong ba tang lada don ba wan kyrpad ïa u ba un thaiñ na ka bynta jong ki u hap ban thaiñ hynrei um ju buh dor hynrei u pdiang katba ki ai sngewbha.
Utei u parad u la ong ruh ba ka kam ban thaiñ jingthaiñ da ki siej kam dei kaba suk namar ban leit pom ïa ki siej na khlaw ne na kper ka don la ka por hynrei ban shu pom klumar khlem da tip ïa ka por ki tiar ba la thaiñ kin ym shah slem bad wat ki siej ruh ki bam khñiang bad ki pyut kloi.
U la ong ruh ba lada nang ban kheiñ ïa ka por ki tiar ki skhem bad neh slem bha lada pyndon kam. U la bynrap ruh ba ha kine ki sngi bun kim tip shuh ban kheiñ ïa ka por ban pom siej pom dieng ki tymmen ha ki por haba ki mut ban thaw ïing ki da kheiñ ym tang ïa ka sngi bam pom hynrei ki kheiñ wat ïa ki bnai ruh bad ki tip ha kino ki bnai ki dieng ki siej ki long ban pom na kabynta ban pyndon kam hakaba thaw ïng thaw sem bad wat haduh kine ki sngi ki dang don ki ïing ki sem ba ki tymmen mynshuwa ki la thaw da ka dieng hynrei ki dang neh bad kim bam khñiang satia.