SHILLONG, Kyllalyngkot 18: Ki jingïalehkai ka lympung Shillong Cricket League 2nd Division 2026 ba la pynïaid da ka Shillong Cricket Association, hynne ka sngi U Blei la sakhi ïa ka Sportive CC bad ka Masonic kiba la khur jingjop hadien ba ki la lah ban pynliem ïa la ki jong ki liang pyrshah. Ka Sportive ka la pynliem noh da 5 wiket ïa ka Lagan 2.0, katba ka Masonic ka la jop da 12 ron pyrshah ïa ka Matrisangha.
Ha ka jingïalehkai ba nyngkong hapdeng ka Sportive bad ka Lagan 2.0, la ïohi ïa ka Lagan 2.0 kaba la kam trai ban tied nyngkong bad ka la buh ïa ka thong kaba 138 ron haki 20 ober bad hap 5 wiket. Kiba la lamkhmat ha ka tied ki long u Firoz Ali (32 ron naki 52 bol) bad u Subhash Kumar Rai (36 ron naki 17 bol).
U Suresh Balmiki, rangkawang bol jong ka Sportive u la khur 2 wiket, ailad tang 38 ron naki 4 ober, nangta ka kynhun ki nongtied ki la pyndep ïa ka kamram da kaba kamai 142 ron ha ka jingduh noh tang 5 wiket haki 14.5 ober ban khur ïa ka jingjop.
U Rajdeep u la lah ban kamai 27 ron naki 24 bol, hynrei ka namtam ka la leit sha u Ravi Kumar, uba la noh synñiang 51 ron naki 40 bol, kaba la pynlong ïa u ban khur ïa ka nam Player of the Match.
Nangta ha ka jingïalehkai kaba bud, ka Masonic ka la buh ïa ka thong kaba 177/8 haki 20 ober, ha kaba u Bunny Sharma (52 ron naki 34 bol) bad u Bharat Rana (29 ron naki 22 bol) kidei ki nongtied kiba kongsan.
Haba pyrshang beh ïa ka thong, ki nongtied jong ka Matrisangha ki la lah ban kamai tang 165/5 haki 20 ober, watla na ka liang jong u Bikash Dey (55 ron naki 50 bol) bad u Kishore Bhowmick (45 ron naki 32 bol) ki la lehkai bha ha ka tied.
Nalor ba u la seisoh ha ka tied, u Bunny Sharma (52 ron), u la tyngshaiñ ruh ha ka boling na ka bynta ka Masonic, da kaba khur 3 wiket bad ailad tang 27 ron naki 4 ober, kaba la pynlong ïa u ban ïoh khur ïa ka nam Player of the Match.
