Shillong, K’ Lyngkot 15: U Myntri Rangbah ka jylla u Conrad K Sangma u la buh ïa ka thong kum ka rai snem thymmai kaba ha khmat eh ha une u snem 2026 da kaba u la ong ba ka thong ba ha khmat eh u kwah ban ïohi ïa ka jylla Meghalaya ba kan long kaba khuid bad kaba suba.
Haba ïa kren bad ki lad pathai khubor u Conrad K Sangma u la ong ba ki don shibun kiei kiei hynrei un kham pynleit jingmut haka jingkhuid jingsuba hapoh ka jylla namar ba ka National Games yn pynlong hangne bad u kwah ba ki briew kiba nabar ka jylla kin sakhi ïa ka jingkhuid jingsuba.
“Yn hap ban shim lut ïa baroh ki lad ki lynti ha ryngkat lang bad baroh ki nongïadon bynta lang bad ngin pyrshang ban pynïaid sha khmat ïa ki kam baroh khnang ba ngin dup lah ban poi sha ka thong,” ong u Conrad.
Shuh shuh u Conrad u la ong, Ngi kwah ba ki briew kin iohi ïa ka jylla Meghalaya kaba khuid bad kaba suba bad ngin pyrshah ban pynïoh ïa kaba ngim pat ju iohi mynshwa.
Haba kylli u la ong, “ki don shibun kiei kiei kiba ngi angnud bad kwah hynrei kam dei ka por bad ka ïa ban ïakren lut hynrei ngi don ka thong ba ngin pynïaid sha khmat, hynrei kaba kham donkam eh ka long ba ngi hap ban peit ïa ki mat kibangim shym pat lah pynbeit”.
U Conrad u la ong, Ngi la pyrshang ban wad ïa ki lad ki lynti na ka bynta ban ïarap ïa ki nonghikai skul, hynrei ngi dap pat da ka jingkmen ba ngi la lah ban pynbeit ne weng ïa ka jingeh ki nonghikai ha shwa ba u snem rim un kut noh bad kumjuh ruh halor ka bai bam (scholarship) ki samla pule ha kaba ngi la dep ïa kren bad ka sorkar ban pyllait kloi.
