Plie paidbah u Bah Kyrmen Shylla ïa ka madan futsal ha shnong Byndihati

Khliehriat kyllalyngkot 14: U MLA jong ka Khliehriat, u bah Kyrmen Shylla, mynta ka sngi u la plie paidbah ïa kawei ka madan futsal ha shnong Byndihati East Jaiñtia Hills District bad kane a madan ka dei kaba la wan lyngba ka skim District Mineral Foundation (DMF) bad ki la don haduh shiphew tylli ki madan futsal kiba la dep plie paidbah bad lai tylli kiwei pat kiba yn sa plie noh shen, kine ki madan ki dei kiba wan lyngba ka skim DMF.
Haba kren kum u kongsan, u bah Kyrmen Shylla u la ai ka jingkhublei ïa u Deputy Commissioner, East Jaiñtia Hills District bad kumjuh ruh ïa ki tnat treikam bapher bapher bad ki nongpynïaid shnong kiba ïa don bynta lang ha kaba shna ïa ki madan futsal hapoh ka district halor ka jingpyntrei bha ïa ka kam, u kyntu ruh ïa ki khun samla kiba na shnong Byndihati ba kin pyndonkam bha ïa kane ka madan ka ban long na ka bynta ka bha ka miat jong ki hi bad u la ong ïa ki nongpynïaid shnong jong ka shnong Byndihati ba ki lah ban wan sha u ha kano kano ka por ha kaba ïadei bad kano kano ka kam pynroi hapoh shnong bad ong ruh ba ka jingdon kane ka madan kan iarap ïa kito ki rang ialehkai bad kan pynshlur ruh ïa kiwei ba kin ïa shimbynta ha ki kam ialehkai sport.
U Shivansh Awasthi, IAS, u la pynsngew da kaba ong ba kane ka madan futsal ha shnong Byndihati ka dei kaba madan futsal kaba shiphew kaba la shna hapoh ka district kaba la bei tyngka da ka District Mineral Fundation bad ki dang don shuh sa lai tylli ki madan kiba la dep shna bad ïa kine ruh yn sa plie paidbah noh shen, u la ong ba kane ka sienjam ka dei ruh ban pyniar ïa ka jingiohi jngai ka sorkar jylla kaba don ka jingthmu ban kyntiew ïa ka kam lehkai sport.
U Awasthi u la bynrap ba ki la don ruh bunjait ruh ki skim pynroi ne ki project bapher bapher kiba la wan na ka District Mineral Fundation kiba la pyntrei hapoh ka district ha ki snem kiba la dep ha kaba la dep ban pynshna bad maramot haduh kumba 50 tylli ki ïing skul, la pynlong ruh ïa ki prokram ba kyrpang ha ki project jong ka winter camps ha kaba lyyngba kane ka winter camp ba la pynlong la kynthup lang ruh ïa ki prokram jingpynshai ha kaba ïadei bad ka jingshyrkhei u drok, ha kane ka winter camp la ïa shimbynta da ki khynnah skul kiba naduh ka klas VIII haduh klas XII, shuh shuh lyngba ka DMF la iarap ban kyntiew shuh shuh ïa ki jaka ai jingsumar kum kaba maramot pynbha ïa ki Primary Health Centres (PHCs) bad kaba pynbiang ïa ki tiar ai jingsumar ha Civil Hospital Khliehriat.
Kiba la ïa don ryngkat lang ha kane ka jingplie ia kane ka madan Futsal ha Byndihati ki kynthup ruh u Sub-Divisional Officer (SDO)- Sadar, East Jaiñtia Hills District, u Manish Kumar, IAS, u MDC jong ka Sutnga-Nongkhlieh, u bah Hambertus Nongtdu, ki nongsynshar shnong lem bad ki nongshnong shnong.