Nongstoiñ, K’lyngkot 11 : Ka shnong Mawland (A) ka dei ka shnong kaba don harud ka surok na Ktiehthawïar sha Langpih ka dei ka shnong kaba dap da ki mawramsong kiba heh bad kynjang ha uwei u lum uba kynjang bha uba ki ju khot u lum Mawïang bad ha trai jong utei u lum shaphang mihngi ki don ki krem bad ki synrang maw ha kaba uwei u tymmen uba la tip kyrteng kum u parad Kolin Thongni uba khlem shong kurim haduh mynta haba u la dap 78 snem ka karta u la shong la sah ha kawei ka synrang maw haduh arpew snem kynthih ryngkat bad ar tylli ki ksew jong u.
U nongthohkhubor hadien ba la ïoh jingtip u la leit ban ïakynduh ïa utei u parad ha kaba la ïalam lynti da uwei u nongshong shnong haduh katei ka jaka. Ha ka jingïaid lynti lyngba ki khlaw bad ki khohruh khohram la lah ban poi ha katei ka jaka bad la lap ba sawdong katei ka jaka shong jong u ki dap da ki jingthung jingtep kum ki kait, ki diengsoh, phandieng bad kiwei kiwei. La lap ruh ba utei u parad u la shan ruh da kawei ka pung kaba u ri dohkha.
Ha ka jingiakren bniah bha utei u Parad u la ïathuh ba kumba arphewsnem kynthih u shong u sah ha katei ka synrang maw ryngkat bad ar tylli ki ksew kawei ka ksew kmie bad uwei u ksew khun bad man la ka miet u pynthiah ïa ki uwei sha shiliang bad uswei sha shiliang da kaba kup lang da kawei ka nep bad baroh lai ngut ki ïa im suk im saiñ khlem don kano kano ka jingeh haduh ba ka ksew kmie kaba u ju khot ka ïawmei bad u ksew khun ki la khlad noh.
U la ïathuh ruh ba hadien arphew snem haba u la dep tih pynmadan bad pynlong jaka thung kba ha katei ka jaka kaba u shna ïa katei ka pung u la thaw noh da ka ïng bad u shong u sah noh hangta. Kaba kham phylla shuh shuh ka long ba utei u parad u la iathuh ba u don kawei ka paralok ba ha syndah eh kaba shong ba sah ha poh ki ñiamra ramew jong utei u lum kaba kyrteng ka Satri Nepali kaba sumar ïa u bad haba kylli bniah u la ïathuh ba ka dei ka puri bad lada don mano mano kiba wan kem tuh ïa ki dohkha na katei ka pung jong u shuwa ba kiba thmu wan kem dohkha kin poi ka la wan ïathuh ha u ba ki briew ba mut wan kem dohkha ki la wan.
Kaba kham sngew phylla suhjer bad sngew phylla kaba utei u parad u ïathuh ka long ba ha kawei ka por katba u dang thiah syaid sngi ha jan katei ka krem haba u la ïohthiah lyngai uwei u bseiñ uba heh bha u la mih na shaphang ka krem bad u la wan dem ha ka shadem jong u bad jliah da u thylliej na ka shyntur jong u bad ha katei ka por u nang tharai ba u dei u ksew u la khnñiat da ka kti bad u khlem peit satia ïa ki khmat. Uta u bseiñ um phet satia hynrei u jliah sa na ki khmat bad ha kata ka por u la khie peit ïa ki khmat bad u la kyndit ba u dei pynban da u bseiñ uba heh bad u la khie kynsan ha kaba utei u bseiñ u la phet noh nangta.
Nalor kata ha katei ka ïng ba u shong u sah mynta u don ka radio, artylli ki tynghung, artylli ki Amplifier bad ki solar ha tnum ïng hynrei um pyndon kam bor ding satia. Nalor kata u la ïathuh ruh ba lada don kino kino ki briew kiba shah dait ha ki kynja mrad ne ha u para briew lada ki wan pah peit u tip tang da kaba shu peit ïa ka snam na jrong ka snieh doh bad haba u lap ba ki don ka kynja sni ha ka snam u ju bthah ïa ki ba kin leit shim dawai na ki doctor hynrei ïa ka sni kaba don na ka jingshah dait ha ki para briew te ym don ba lah ban ai dawai wat ki doctor ruh kin ym lah satia.
