Shillong, K’Lyngkot 11: Ka Federation of Khasi, Jaintia and Garo People (FKJGP), Garo Hills Zone, ka pynrem jur ïa ka jingjia kaba la jia ha ka janmiet jong ka 9 tarik u Kyllalyngkot, 2026 ha Goalgaon, Rajabala, ha kaba Dilseng M. Sangma, u dkhot jong ka ACHIK, u la khlad noh namar ka jingjia shah thombor.
Ha ka kyrwoh khubor ba la pyllait da u PritamArengh uba dei u President ka FKJGP, Garo Hills Zone u la ong, Ngi la shim khia bha ïa kane ka jingjia bad ngi dawa ba dei ban pynngat mardor ïa ki briew kiba donkti ha katei ka jingjia bad dei ban pynbiang ïa ka bai lut ksan sha ka iing ka sem kaba la duh noh kloi katba lah.
Nalor kata, ngi dawa ruh ba dei ban pynlong ïa ka jingtohkit kaba bniah bad kano kano ka jingbakla ha ka jingtohkit yn niew kum ka jingbym hok bad ka jingbym shim khia ïa ka jingmyntoi jong ka jaidbynriew Garo. Ka jingtohkit ka dei ban long kaba shai, kaba hok bad ban pynthikna ban ym map ïano ïano ha ka por ba tohkit ïa kane ka kam, u la ong.
Shuh shuh, ha kaba ïadei bad ka par tih maw kaba la pynmih ïa katei jingjia dei ban khang bad kurup mardor. Nalor kata, ki paidbah jong ki thaiñ ki dei ban buh ha ka jingmut ïa ka jinglong ïa ka jingsngewkhia ha kaba ïadei bad kane ka mat bad kidei ruh ban ïa trei lang bad ki bor ba dei peit ban pynithuh bad ban kem ïa ki briew kiba donkti ha katei ka jingjia.Kane kan ïarap shibun ban pynthikna ban ïoh ïa ka hok na ka bynta kiba ha iing ha sem kiba la duh noh bad ban pynïoh biang ïa ka jinglong jingman kumba ju long ha kane ka thain.
Ha kum kane ka por jong ka jingsngewsih bad jingkthang kaba khraw, ngi phah ka jingsngewlem ïa ka iing ka sem kaba la duh noh.
