Wat pynphriang klumar ïa ki khubor lamler namar ba ka ïalam bakla, kyntu u SP ka WGHD

Shillong, K’Lyngkot 10: U Superintendent of Police (SP), West Garo Hills, Tura u Abraham T. Sangma u la kyntu ïa ki paidbah ka jylla bad khamtam eh ha ri lum Garo ba kim dei ban pynphriang khubor lamlar kiba khlem pat pynshisha namar ba ka ïalam bakla.
Kane ka jingkyrpad u SP kadei hadien ka jingjia ba la pyntip na ka thain Goalgaon kaba hap hapoh ka Rajabala Police Station ba ha ka 9 tarik la ïoh jingtip ba kila don ki jingthoh bad ki khubor ki ba ïalam bakla ki la saphriang ha ki social media bapher bapher.
Katkum ka kyrwoh khubor ba la pyllait da u SP u la ong, “Kum kine ki jingleh bad ka jingpynphriang ïa ki jingtip lamler ka don ka jingma ban pynthut ïa ka jingïatylli ha ka imlang sahlang bad ka shongsuk shongsain ki paidbah ha ka thain.
Ki Pulit ka District ki kyrpad jur ïa baroh kiba donkti bad ïa ki paidbah ba kin pynneh pynsah ïa ka shongsuk shongsaiñ, bad ban ym shah ïalam bakla ha ki khubor ham-saïa ne ki jingthoh ki bym pat lah ban pynshisha.
Shuh shuh u SP u la ong, La kyrpad ïa baroh ba kin kiar na kaba pynsaphriang ne pynpoi ïa kum kine ki khubor, bad ban leh da ka jingkitkhlieh ha ki social media.
Lada don kano kano ka jingkulmar jingmut ne jingartatien ha kaba ïadei bad ka jinglong jingman kaba dang ïaid shakhmat hapoh ka District, la kyntu ïa ki paidbah ba kin leit sha ki bor pynïaid District / District Police / Police Station ba jan tam, Out Post, Beat House, lane sha Police Control Room (PCR), Tura, lyngba kine ki mobile number harum: +918837423053, +917005530510, +919089199064.