Shillong, K’Lyngkot 9: U Myntri Sorkar bad u MLA ka NPP na Resubelpara uba dei peit ïa ka tnad kam jngoh kai pyrthei u Timothy D Shira u la pynpaw ba ka jylla Meghalaya ka khmih lynti ïa ka jingkiew jong ka jingwan ki tourist ne ki nong jngoh kai pyrthei mynta u snem 2026, hadien ka jingkiew kaba kynsan bha ha ka kam jngohkai pyrthei ha une u snem ba la dep.
U la ong ba ki prokram bapher bapher ba la ïalam da ka sorkar, ka jingpyndep ïa ki projek jngohkai pyrthei bad ki jingthmu ban kyntiew ïa ka Meghalaya kum ka jaka ban leh kmen Khristmas kan nang kyntiew shuh shuh ïa ka jingwan ki briew.
Shuh shuh u myntri u la bynrap ba ka jingpynbha bad ka jingpynïasoh ïa ki surok bad ki jingtei ka khring ïa ki nong jngohkai pyrthei kiba kham bun sha ri lum Garo, ha kaba ha ki por ba mynshuwa ka kham duna ha ka jingleit jingwan.
U Shira u la ong ba ka sorkar kan ai ruh ïa ka ram kaba suk na ka bynta ban shna ïa ki homestay ban pynïar ïa ki jaka sah bad ban pynthikna ïa ka jingmyntoi kaba kham heh na ka jingroi jong ka kam jngohkai pyrthei.
