Shillong, K’ lyngkot 09: Ka North Eastern Council ha u bnai Nohprah ka la pynlait pisa T. 13,45,38,500/- tyngka sha ka sorkar Meghalaya na ka bynta ki skhim bapher bapher ha East Khasi Hills District.
Katei ka pisa ka long ban pyntrei na ka bynta kiba bun ki skhim, ban pynwandur thymmai ïa ki pipe um, ban shna ïa ki jaka pyntuid um ha ki san tylli ki jaka, ki kali kit ñiut, ki jaka bret ñiut, ban buh ïa ki light bad ban dro dur bad ban pynitynnad ïa ki dukan ba don harud surok ha Ïewduh.
Kiwei ki jingtei ki long ban shna ïa ka jaka jngohkai ha Laitlyngkot ha Lamlyer ha EKH District, ban shna ïa ka ïing seng ha Lum Shat Sngi, Kenches Trace, Shillong jong ka Raid Laban.
Na katei ka pisa la mang ruh ban shna ïa ka ïew kaba saw mala ha Ïewdak ha Laban kaba dei kawei jong ka Shillong Municipal Board ban die ïa ki jhur ki jhep ki soh ki pai, ki tiar shna kti, ka doh sniang ha katei ka jaka.
Ha kajuh ka por ban shna ruh ïa ki ïing skul jong ka Ramakrishna Mission ha ka shnong Laidiengsai, Mawrah, Laitryngew, Wahlong, Pynursla, Pomsohmen bad Nongkynrih, ïa katei ka pisa la pynlait ha u bnai Nohprah.
