K a jingpyntrei ïa ka surok Fourlane naduh Umshyrpi ter ter haduh Pomlum ha ka Phase -1 watla ka la ïaid stet ha u bnai Naiwieng – Nohprah jong u snem ba la dep hynrei kiba bun ki paidbah ki buh ka jingkylli la ka jingpyntrei ïa kane ka projek ka lah neem ban dep noh mynta u bnai Kyllalyngkot.
Lah ban kdew hangne ba ha ka jinghiar jurip jong u Symbud Myntri Rangbah ka Jylla Bah Prestone Tynsong dang shen ïa ka jingpyntrei ïa kane ka projek naduh Umshyrpi ter ter haduh Dawki, na ka liang ka kompeni kaba pyntrei ka la kular ba ïa kane ka Phase -1 kin pyrshang ban pyndep noh ha u Nohprah 2025.
Ha kane ka jingjurip na ka liang u Symbud Myntri Rangbah u la ong ruh ba shwa u Snem Thymmai ki paidbah kin sa ïoh ban pyndonkam noh da ka surok ba thymmai. Hynrei na ka liang ki riew paidbah ki la pynpaw ba watla ki la don bun ki jaka ba ki la ïoh ban ïaid na surok ba thymmai hynrei ki dang hap ban mad ïa ka dheng kali tang shu poi ki bynta na 3Mer ter ter sharum namar bym pat dep ka jingkieng thymmai ha Umshyrpi.
Hynrei kumba ka paw pat haduh mynta la kiba bun hi ki pynpaw ba lada ka kompeni ka lah ban pyndep noh mynta u bnai ïa ka jingkieng bad ïa ki katto katne ki bynta jong ka surok kiba dang sah lehse kan long ka jingkyrkhu kaba khraw ïa ki paidbah kiba leit ba wan man ka sngi na katei ka surok.
Tangba lada kren pat ïa ka jingshisha, lada ka kompeni kaba pyntrei ïa kane ka surok fourlane kim pat lah ban pyndep ha shwa ban sdang ka aiom long skul ka nongbah Shillong kan sa sahkut beit sbak bad diang bad mon. Kane kan jia namar ha ki bynta jong ka Upper Shillong khamtam naduh Umdiengpun ter ter haduh ban da poi ha 2 Mer ka surok ka la heh tangba tang shu poi pat harum Lad Lummawbah ka surok ka la rit bad ki kali kiba ïaid ki hap ban ïaid kawei shilliang katba ha ki bynta ba shaneng jong ka surok pat ki la ïoh ban ïaid ar tylli shilliang kaba mut shisien ïaid ki lah ban ïaid saw tylli.
Kumta, da kaba peit ïa ka jingnang bun ki kali kiba ïaid ha ki surok bah jong ka nongbah Shillong la donkam ban pynstet ïa ka kam khamtam ha kibynta jong ka Jingkieng Umshyrpi khnang ba k ajingkieng kan dep noh kham kloi bad ba ki kali kin ïoh ban ïaid ar tylli shilliang surok ha kajuh ka por. Ban pynurlong ïa kane, ka dei ka kamram jong ka sorkar jylla ban jyrwait shkor ïa ka kompeni kaba pyntrei ba kin pyntikna ba ka jingpyndep ïa kane ka surok ka dei ban long noh kham kloi kumba ki la kular ha shwa u Snem Thymmai.
Ho-oid ym lah ruh ban len ba ka buh jingeh bha ban trei khamtam ïa ki mashin heh ba kin treikam lada ym ïoh laitluid ka ïaid ka ieng namar ki hap pyrkhat ruh ïa ki kali kiba ïaid lyngba. Halor kane ka bynta ym lah pat ban kynnoh ïa ka kompeni kaba pyntrei namar ki ruh hapdeng bun ki jingeh ki hap ban ïakhun tyngeh ban beh ïa ka por ba la buh da ka sorkar.
Kumta, ki paidbah ka jylla khamtam kito kiba sah ha ki bynta ba shaneng jong ka Upper Shillong la ka long ïa ki kali kiba wan na ki bynta jong ka West Khasi Hills, South West Khasi Hills, Eastern West Khaasi Hills, thain Sohra bad thain Pynursla ba kin khmih lynti da ka jingkyrmen ba kane ka surok thymmai kan dep noh kham kloi namar lada thut tang khyndiat ka bynta jong kane ka surok kan ktah pat ïa ka leit ka wan jong baroh ki kali kiba wan na kine ki distrik ban poi sha nongbah Shillong.
