Nongpoh, K’lyngkot 06: Ha ka jingbteng ki Pulit ka tnad Traffic na Nongpoh Branch mynta ka sngi ban pynlong ïa ka jingtalasi Kali ïa ki kali ba pynkheiñ aiñ, kiba bun tylli ki Kali paidbah kiba pynkheiñ aiñ ki la shah dain kuna napahng kaba dei katkum ka kyndon aiñ kaba ki la pynkheiñ khlem da bud ïa ki kyndon aiñ ñiah Kali.
Kane ka jingshah daiñ Kuna kiba bun ki Kali ba pynkheiñ aiñ, ka dei mynta ka sngi ba ki Pulit na ka Traffic Branch jong ka Nongpoh Police Station ki la bteng ban khynra kali ha ka surokbah National Highway-6 ba hap ha ki bynta jong ka shnong Umling bad lyngba kane ka jingkhynra Kali naduh ki Kali heh haduh ki kali rit kiba bun ki kali ki la shah daiñ kuna na ka daw ka jingpynkheiñ kyndon aiñ.
Kane ka jingtalasi kali ki kynthup naduh u Nongñiah ba dih buaid, ki kali ba pynher sted, ki Kali bym deng Seat Belt, ki Kali bym biang kot biang sla bad kynthup ruh ki Kali ar shaka kiba ym deng Helmet bad kiwei kiwei kiba ki pynkheiñ aiñ. Kane ka jingtalasi kali ka dei ruh shi bynta ban ai jinghikai ïa ki nongñiah Kali bad ïa ki paidbah ba ki dei ban tip ïa ki kyndon ñiah Kali bad kino kino kiba pynkheiñ aiñ kin nym lait na ka jingshah daiñ kuna kiba dei katkum ki kyndon ka aiñ.
Kumba la ioh lum jingtip, na kane ka jingtalasi Kali ki Pulit ha Umling, ki Pulit ki la ioh ban daiñ kuna haduh T. 30 hajar na ki Kali kiba pynkheiñ aiñ khlem da map satia bad na ka liang ki Pulit ka Ri Bhoi ki la rai ban dang rai ban bteng ïa kane ka jingtalasi Kali kaba long shi bynta ban ai jinghikai ïa ki paidbah bad ruh na ka bynta ka jingshngaiñ ki paidbah ha ka leit ka wan lyngba kane ka surokbah khamtam ha ki snem ba la leit noh bun ki jingjia ba sngewsih ki la jia tang na ka daw ka jingdon ki Nongñiah Kali ba ñiah khlem akor ha kane ka surokbah.
